38
Amisye anonae arono no irati wanene rai
1 Masmur Daud po ratoe, arono po anakotare rameseo Amisye Ai indamu Amisye aemeno ai.
2 AMISY, syare vemo Nyo Nya pari mangke raugaje rinai nora,
vemo Nyo Nya pari mpanyoane veano inanepat inya.
3 Weye Nya pari mangke mo rinaron maisyare atoe inta nteto rinai to wemaisy,
winaneme mo mangke veano inatawan asyo.
4 Ti rigwaneno mangkebe rave kobe weye wimpari rinai,
inanasine so njoram tenambe weye sya ayao kakai mbewar.
5 Weye taune sya ana dave ti ngkakai manakoe rave, ti mo inatatuv asyo,
sya ayao kakaije umaso mangke dave kobe rinai.
6 Sya pare mamo anane ntuna rai janyi ti ranavane mbaug,
weye taune risyananepabe.
7 Sya wanene mangke dave weti riseo tete kakai,
masyote tename wemamo risyoyov maisyare rino memene rai wemaisy.
8 Weye wanene ama mamoane mansanano inanasine rai vintabo,
inanasine somamo inta nsaumane ramu.
9 Sya vambunine meweno rinai muno inanasine mbanonom to,
syanonae weye inanuga ntanamanine jewen.
10 Akoe Winy, Winyi Nyo sya bekere raen tenambe,
muno sya ana idanonae mamo ngkokaibe no winamune rai ramu.
11 Sya okami pirabe rave, sya vambunine raumandi rinai,
muno sya wanene mo rinaveti inamije ndadiri.
12 Waneno nande rinai mbewar ti sya arakove muno sya manivuvi wo rinamumuibe,
muno sya arakovo yavaruga ugwaravainyo rinai.
13 Vatano ware ubekero wo rinaubaisye nawamo wo isyeane ratugar ti mo inaman.
Vatano manatantonave rinai nawamo ware wo rinaubai da inaumandi.
Masyote tename weamo anapamponae obo mirati wanyinyaube raijo rinai.
14 Weramu risyamo maisyare vatano amarikoame mpapaki weti syo awa ayao ranaune ramu,
maisyare vatano awa ngkao weti syayao kakai.
15 Tugae, risyamo maisyare vatano po ana inta ranaune jewen,
weti syo ayao inta rasakinavo mai ramu.
16 Weramu sya AMISY, rinanave namen,
Amisy, sya Akoe Winy, sya ana danajo mamo indati Nyo ravera mamaisy.
17 Weye syo nanajo to, syare: ‘‘Ranivara ritemaje, weamo vemo sya marova umararin nora,
vemo Nyo rinapayamo vatano wo rinambaone mansananibe inya.’’
18 Weye risyamo kavintare wo rinapinde,
muno rinanuga so njoram tutiro sya siurije rai.
19 Risyo taune sya ana daveti ngkakai raura kakavimbe,
rinanuga so ranimaumbe rave weye syo sya ayao kakai ratantonave.
20 Vatano umarovave rinai vayave ayao mamaisye jewene rai nawamo wanui,
sya ana inta mbe ayaobe jewen, weramu vatano manuga mamuno rinai nawamo wanui.
21 Sya ana daveti ngkove mamo wo rasakinavo ana mamune obo rai,
syo ana ngkove obo rave, weramu onawamo umarovave rinai vayave.
22 AMISY, vemo Nyo rinapaya nora,
sya Amisy, vemo nggwaravainyo rinai nora.
23 Syare nyavave ra nde Nyo sopambe rinai,
sya Akoe Winyi Nyo inapaya irati kakai rai.