40
Sambaya kove raura Amisye Ai muno nya mbekere ranajo
1 Masmur Daud po ratoe. Nto irati akari po vatano matayao ukiny maugavo ransyerane rai ai.
2 Rinatawandi syo AMISY atunao,
weti umba Po rinaen muno Po sya anonae raraniv.
3 Po rinapaya irati atemo wene rai,
omamo maisyare Po inakarimu sen no kanuga nsararane rai wemaisy.
Po rinapaato te no unato orame von,
Po rinaveti inawanto tindimuve muno ino kovo saumane rai.
4 Wama Amisy Po ransyerano wanyine raunande ti rikinyo rai,
indamu syo veano ararimbe.
Indati vatane wanui wo AMISY Apa ana dave raen,
ti wo asyaniv umba wanave Ai.
5 Kove ngkov irati vatano wanave AMISY obo Aije mai,
onawamo umamanaive nanto vatano mararine mai jewen,
muno manaveano vatano wangkarive mansamene ramu!
6 AMISY, Winyirati sya Amisy, Nya anakotaro ndave mamo manui rave,
Nya mbekero Nyo ratantona reansai mamo mbe anainambe rave irati reansai.
Winyamo inta po namaisye ramu!
Syare syo Nya anakotaro ndave ravovo muno syo raura,
weramu ama manui mamo nseo rave ti ratore kakai.
7 Winyamo nanuga no irati maero raotar
muno anaisyo raugavere rameseo Nai raije ramu.
Maere rameseo Nai muno ama mavu raunanto indamu veano ayao kakai rapaya mamo
Winyamo ntuvako rai ramu,
yara nyare ibeto Nya ayao rai wemi mbewar Winyo ana ranaune ngkove raude rinai.
8 Umba syo raura syare: ‘‘Tugae, risyi so,
syare syo rave maisyare Nya bukuge mo inaurairive wusyimbe, no ama ayao mo ratoe rai wemaisy.
9 Sya Amisy, inananibe ibeto Nya mbekere rai,
Nya anaparatote mamo syo raugasyo ntami sya wanyatije rai.’’
10 Sya AMISY, Winyamo Nyo raen tenambe to,
Nya ayao mamaisye mamo syo ravovo Nya kawasae wanui so mansamun,
omamo mpaya inawa so rai jewen, yara syo raura tutir.
11 Nya ayao mamaisye mamo ritanamanino rautan no inanuga so jewen,
winteto Nya urairi rai me, Nyo reansapaya irati ana ngkakai rai me nayamo syo ravov tutir.
Winteto Nya urairi rai me, Nya muinyo no tawane me nayamo rimanino rautane ramu,
yara syo raura kakavimbe no Nya kawasae wanui so mansamun.
12 AMISY, syare naemeno rinai tutir muno windarino rinaora,
weye Nya muinyo no tawane me, winteto Nya urairi rai omirati ntavono rinai.
13 Weye ana nsosobe mo rinawariki mamo manui rave, ti ratore kakai,
muno taune sya ayao kakai mo rinawatan ti syantukambe to rije rai.
Sya ayao kakai manui rave ti mo inakarivuinye so rakivan,
mo inaveti inanuga mamaun.
14 AMISY, syare naemeno rinai indamu Nyo inapaya irati sya marova mai,
sya AMISY, syare nyavave nde Nyo rinasopan!
15 Syare koveamo vatano ware wo rinaubaisye nawamo,
Nyo mapinde ti usamane muno mpusyek tatugadi.
Syare koveamo vatano ubekero siurije nande rinai nawamo,
Nyo matamo ra wansuk akiri muno awa tame ngkakai.
16 Vatano wugoeno rinai useambe rinai ware: ‘‘Ko dave, ko dave...!’’,
syare koveamo onawamo usamane dave.
17 Yara vatan tenambe nanawirati ude ubeaje Amisye Winai nawamo
koveamo umananibe muno manayanambe irati Nya ana ndave rai.
Vatano mansanuga no Winai weye Nyo mapaya kakai rai nawamo
koveamo wo raura tutir ware: ‘‘Tugae, AMISY Opirati panakoeve rave!’’
18 Weramu risyamo vatano inatawanto muno sya ana jajewembe rinai;
syare sya Akoe winaemeno rinai.
Weye Winyirati Nyo sopambe rinai muno Nyo inapaya irati anakotaro ngkakai rai,
weti sya Amisy, syare vemo maneai nora!