2
Vatano Amisye taune Po aijaseo akarijo titi rai
1 Wakoe! Veanimaibe susyo wanave Amisye Ai jewene ubesea mangkakeraive?
Veanimaibe susye kotare manatantonave ana ngkakai rai?
Weramu indati ubea marudija!
2 Akari titi mine so wanatatayaube tenambe,
muno akari akokoe wanunugambe wanyinyaube,
indamu umarovave AMISY Ai, muno Apa akari titi Po aijaseo ai.
3 Akari akokoe umaso wo raura ware:
‘‘Wade! Wampapaya irati aya ibe akarive wansai rai,
muno wamo aya vambunino mo wansaokaisye radaut.’’
4 Akoe tuna no Apa kursijo titi rai no Manunggara
pugoeno mai muno Po maura tantunawi.
5 Umba soowato mai Apa parijo mangke rai,
muno Po mapapabe irati Apa parijo mpanyoane rai.
6 Amisy Po raura pare: ‘‘Nai Sion, Sya unato ndandinit,
Syo akari syatayao aijaseo akari titi rai to!’’
7 Ribeker syare syo AMISY Apa ayao Po raura aje rinai ravov,
Po raura pare: ‘‘Winyamo Sya arikainye pi winy!
Masyoto unumeso Syo naijaseo akari rai, Syo nawainamo Sya arikainye pi winy.
8 Syare nyo Rinanajo indamu Syo susye kotare maunande ti nya ura mai tawan,
muno muni tename som ti nto no ama marane rai, omamo syo raunande indamu wimbe akarive rai tenambe.
9 Wenawamo indati winyo manepati nya isyo besije rai,
muno nyo makupi vintabo, maisyare kavine inta ravari ti ngkukupi vintabo wemaisy.’’
10 Maisyare omaiti, akarijo titi weap, syare wapo rakarae kobe!
Inya, akari akokoe mine so weap, wapo ananyao raraniv kobe!
11 Wabeaje wapanapatambe AMISY Ai muno wapo asyaniv,
wabeaje watutar no Amun.
12 Indamu vemo Amisye parijo wasai mo wapuenen papabe inya,
weye Apa parijo mangke mamo nde papabe rave.
Kove ngkov irati vatano ugaugambe Amisye Aije mai.