MASMUR
AYAO MANASYIN
Bukugo Masmur somamo Ayao Amisy ama nake inta mije, wemirati ransyeran muno sambaya no rai. Arono manasyin dave ratoe irati ayao Ibrani rai. Tume pakoe rave omirati Masmur umaso ratoe anyi: manasyin dave Musa po inta ratoe, umba mansanan ava Daud po inta ratoe, umba nto ava kawasae Yahudi wuje Babel raora ti wakata no Israel weamo wo Masmur inta ratoe tavon. Bukuge somamo vatano makarikuga mbaro ransyerane rai wo ratantona ti wo ratoe muno ukiny daive. Umba ransyeran muno sambaya umaso, vatano Israel wo ranunugambe akato muno wo ratoe indamu ukiny dai no arono wo sambaya rave, weti umba ratoe tavon no Ayao Amisye rai.
Ransyerane kotaro ratoe umaso ama kotare manui, maisyare so: inta mamo ransyerano kangkaman, muno ransyerano mbeaje Amisy Ai. Inta mamo sambaya Amisy anajo indamu aemeno nai, inta mamo Amisy anajo indamu darino naora muno Po napaya ana nsosobe rai. Inta mamo sambaya Amisy anajo inda Po ayao kakai rapaya muno inta mamo ransyerano kove raura seo Amisye Ai weye Apa kove nde nai. Inta mamo sambaya Amisy anajo indamu Po mangke raude marova mai. Ransyerane umaso inta mainyamo mo vatane apa anaundi no anuga rave raura, yara kaije inta mainyamo mo anugano Amisye awa ubekedaije muno manaundije raura.
Tamo Amisy ratoe ayao Yawa rai no taiso: ‘‘AMISY’’ ratoe urupijo akokoe rai tenambe som, no ayao Ibrani rai mare YHWH (bacave raijamo Yahweh.) Muno ‘‘Amisy’’ ratoe urupijo akoe no manasyine obo rai som, no ayao Ibrani rai mare Elohim. Amisye Apa tame jirume umaso mbe mobe no buku Masmur so rai.
Masmur umaso ama ayao mamo Yesus Po inta raura nakato. Muno vatano wo Urairi Wanyine ratoe nawamo wo Masmur ama ayao inta ratoe akato tavon. Anugano Kristen manasyin dave maija ndea naiso manayanambe tenambe wo Masmur raugavo sambaya rai.
ETET RAOSO DAI:
Masmur umaso ama mote 150, raosor akato ama etet radani, maisyare so:
Etet Manasyin: moto 1–41
Etet Jirum: moto 42–72
Etet Mandeij: moto 73–89
Etet Mambisy: moto 90–106
Etet Radani: moto 107–150
ETET 1
MASMUR 1-41
1
Vatano kov muno vatano mamun aya unanui
1 Kove ngkov irati vatano are pirati ponae beto vatano mamune awa ananyao raiji,
muno ponae tavondi vatano wo ayao kakai rave awa unanui raiji,
muno ponae tuna vatano wo Amisye aura tantunawi matavoni.
2 Yara apa bekere mamo ananyao AMISY,
muno siman naman po ananyao AMISY obo ratantona tutir.
3 Indati anakere kotar po raijare mamo ama ine raen,
raurata inyo moto nte no mana tuga
ama wao mayone ramu,
arono anamuke ama muki nande, weamo man dave.
4 Yara vatano mamune usasye,
onawamo maurata kapume rai,
ovare damawisyamo nsaonto ti rakanive.
5 Maisyare omaiti, onawamo usayae kakai no AMISY amun,
arono Po mangke rapatimu,
weye ayao kakai no mai ti usisa vatano kove mai jewen.
6 Weye vatano kove nawamo AMISY Po mansayaranande,
yara vatano mamune nawamo wo unanuijo kakai raronto kobe.