3
Ransyeran rikiny dai no awatan ngkov arono marova umarovave rinai
Masmur Daud po ratoe, arono sarar ti to, weye apa kavo Absalom pare be marovave ai.*
 
Sya AMISY, wakoe! Sya marova wanui rave!
Vatano ubesea ti umarovave rinai wanui rave!
Vatane wanui wo inaura ware:
‘‘Amisye pamo indati Po apaya irati marova mai ramu.’’
 
Weramu sya AMISY, Winyirati ndarino rinaora,
maisyare naite apa vakano po raijaro aora ramaisy,
Winyirati Nyo anasineko raunande rinai,
muno Nyo inanuga so raveti mbambunin.
Syo AMISY winanonae inanamoto manakoeve rai,
muno nai Sion, unato ndandinit terave taune ntuna rai,
Winyo sya ana idanonae raveti mamaisyo rinai.
 
Arono naman ribeaje niki muno rinikito mariraave,
muno awatan ngkov ribeseo akato weye AMISY Winyo rinayaranande.
Vatano wo rinawariki ra umarovave rinai awa wanui mamo ratore kakai,
weramu risyamo syo masyanive ramu.
 
AMISY, mbeseo!
Sya Amisy, syare Nyo rinapaya irati kakai rai!
Tugae, Winyi Nyo mangke raude sya marova mai tenambe,
Winyi Nyo vatano mamune umaso awa vambunine radaut.
AMISY, Winyirati Nyo reansapaya irati reama marova mai,
syare Nyo Nya kove raugaje Nya kawasae reansai.
* 3:1 2Sam. 15:13-17:22 3:8 mbeseo: Maisyare muno Pemasmur po apa marova maeno ubesea ti umarovave ai no anemo 1 rai, weti soamo po Amisye awain indamu beseo ra Po apaya irati mai. 3:8 Ayao Ibrani maisyare so: ‘‘Tugae, Winyi Nyo sya marova matamo tenambe mawamona rai. Winyi Nyo vatano mamun awa matomokane radaut bintabo.’’ Ama ine mamo maisyare ratoe no aneme so rai wemaisy.