147
AMISY ararimbe weye Opamo bambunin dave
1 AMISY ararimbe!
Tugae, wama Amisye ararimbe omamo ngkov,
wangkiny Amisy ararimbe omi mamaisy muno ngkov dave.
2 AMISY Po Yerusalem raijar akaeyo ntet,
Po vatano Israel maepar no aroo rai maugav akare.
3 Wepi Po saumane raunanto vatano manuga mpatimu mai,
muno Po awa pare ratavabandi.
4 Wepi Po tumo naume warae ama manui rapatimu,
muno Po tame raunanto mai tutudi.
5 Akoe Opamo panakoeve rave muno vambunine ntairi Ai,
Apa ana daene mamo manakoe rave ti rarope kakai.
6 AMISY Po vatano matakarasyo mansasopambe,
yara Po vatano wonae Ai matakarasyo.
7 Wakinyo ransyerane rai kove raura seo AMISY Ai,
itari raeyan, kinyo ransyerane rai veano wama Amisye ararimbe.
8 Wepi Po kamure raveti mo naume ratatuv,
Wepi Po maru ratayao mine so rai,
muno Po insumai raveti ntatubai unate rai janyi.
9 Wepi Po anaisye raunanto maere kotare mai,
muno Po anaisye raunanto wawake tuvano wo anaisye ranajo mai.
10 Amisye opamo anayanambe kuda marova awa vambunine rai ramu,
muno Opamo anayanambe naite awa vambunine rai ramu.
11 Yara AMISY anayanambe irati vatano wo asyanive mai,
wenawamo vatano manaveano Apa muinyo no tawan tutire ramen.
12 Inya, vatano Yerusalem, wapo AMISY ararimbe!
Inya, vatano Sion, wakangkamambe wapa Amisye Ai!
13 Weye Wepirati Po wapa munije rayaranande ti bambunin
muno Wepi Po kove raugaje wapa arikainye mai.
14 Wepi Po wapa muni rayaranande ti no irati kovo nsaumane rai,
muno Po anaisyo ngkov dave raunande wasai inda waman.
15 AMISY Po Apa ayao raugaje ntami mine so rai,
naije kobe Apa ana daura so nande mamaisy.
16 Wepi Po salju raugaje mo mine so ratatuv maisyare tani wemaisy,
Po raavaro mine so rai maisyare kapumo we.
17 Po maru oram raeparo mine so rai maisyare oram kami we,
indati vatane inta atawandi teto ama nanayao rai kakai.
18 Arono AMISY payao aje maru orame rai, ninimi kobe ti mbe manave,
Po ovare amawisy ti mo mana ninimi umaso raveti njam.
19 AMISY Po Apa ayao raura aje Yakop apa susye obo mai,
Po Apa ananyao muno Apa anaparatote raura aje Apa kawasae Israel umaso obo mansai.
20 Yara Po raugaje susyo kaijinta mai ramu,
muno wenawamo wantatukambe Apa ana dapatimu rai.
AMISY ararimbe!