146
Kove ngkovo vatano anaveano AMISY amen
1 AMISY ararimbe!
Inya sya jugara, nyo AMISY ararimbe!
2 Syare syo AMISY ararimbe arono ta rikov,
muno rikinyo ransyerane rai sya Amisy Ai arono ta rituna.
3 Mbemo mamanaive nanto akari mine so mai jinya,
muno nanto vatano rui vayave mai jinya,
weye ubambunin wo kove raugave kakai.
4 Arono ugwenen, wakasya no kopa, masyoto we tavon wenawamo
awa ana wo ratantona ti ware wo raijare mamo raumandita.
5 Kove ngkov irati vatano manaveano AMISY amen,
weye awa Amisyo panapatambe mai Opirati Yakop apa Amisye tavon.
6 Wepirati Po naume, munije muno mayane ranari
muno anakotar ntuna no ama uga rautan;
Wepi teto Apa urairi rai ma no tawan ntoa nuge nuganui.
7 AMISY Wepi be marimbe vatano matekarasyo mai ti Po maijaseo kove rai,
muno Po anaisye raunanto vatano marore mai.
Po vatano makova mapaya,
8 muno vatano mansamije ntuba nanawamo Po mamije raneka weti wo nuge raen.
AMISY Wepi Po vatano utatayasyo maijaseo usayae tindimuve,
muno bekobe vatano ubeto Aije mai.
9 Wepi Po vatano maran udesen mansayaranande;
Wepi panapatambe irati wanya kavini muno arikainyo wawate mai,
yara Po vatano wonae Ai awa bekere ransopi.
10 AMISY Opamo akarijo titi ntoa nuge nuganui.
Inya, munijo Sion, winya Amisye be akarive susyo miridije nto mansai tutir.
AMISY ararimbe!