104
AMISY ararimbe weye Wepirati Po nuge so ranari tenambe
1 Inya sya jugara, nyo AMISY ararimbe!
AMISY, sya Amisy, Winyirati nyanakoeve!
Nya kovo ntiti muno Nya kovo manakoe mo namuman
maisyare ansuno akoe naasadi rai,
2 muno Nya varo ntiti mo nakom maisyare ansun akoe.
Nyo naume raneka maisyare tanije inta raneka,
3 Winyi Nyo Nya yavare rauseo nte no mana ntuna no naume warae ama vone rai.
Winyo kamure rave nyomambe ti nseo rai,
nseo ovare ai ti mansanano nautan maisyare insani apa pepako mbadiriro nautane wemaisy.
4 Winyo ovare atutir ti poroto Nya mbekere rai,
muno Nyo tanamo mbadurur raveti manapatambe Nai.
5 Winyo munije so raugaje ntamijo aji ntindimu rai,
weti mangkiki kakai ntoa nuge nuganui.
6 Arono mine so ranari rainyoe, Nyo nawanane rayanundi mo nuge ratatuv,
muno nseo ti mo unate ratataanaje.
7 Weramu AMISY winsoowato mana rai ti nsararo rakiri,
Winy nanamote ravari ti mana mansanano panyoambe ti nin kobe.
8 Mana njam no unat ti masyo no kaibiv,
nto no varoro Nyo rapatimu ti nto ntanandi.
9 Winyo anone raugaje ntami mana rai to, indamu vemo mo rakivandi akato inya,
wirati vemo mo muni ratatuv akato nora.
10 Winyo mana ami rapapaya ti njamo kaibive rai,
weti njam no unate ama varodore rai,
11 indamu maere kotaro mandayan bayave wo ramanam,
muno mo maero keledai mawa ngkamandi rapaya tavon.
12 Mararai no mana we rai insani kotare wo ene ranari rarijat,
muno ukiny no inyo uga we rai.
13 No naume vono warae Winyo maru raveti maje papukame rai,
mine so ntairi Nya ana ndaijare ama ine rai.
14 Winyo insumai raveti ntubai indamu maere wisyisyo rai,
muno Nyo anare ratayao vatane mansai indamu wo rayanyum,
wirati nai kopa rai wo awa anaisye raugavo rai.
15 Muno Winyo anggurije raveti ama poke muje rai, weti vatane mananibe rai,
muno manino saitun raveti randi mansamune rai ti ngkenav,
muno anaisye ratavon ti vatane ubambunin dai.
16 AMISY Po inyo arase rayanyum no munijo Libanon,
Apa inyo Po rayanyume wem njayaisy, weye maruge maje ntapekan dai.
17 Nai inyo arase umaso ama awi insani kotare wo ene ranari rai,
muno insani mansyuri wo ene ranari tavon no we.
18 No papukamo ntiti rai kambino mandayane ntuna rai,
no ama orame varodore rai maero pelanduk no rai.
19 Winyi Nyo embae ranari indamu mo matame raroron,
muno uma apa ami pasyo rai mamo Winyi ndapatimu.
20 Ranivara Nyo namane raude, weamo kaumure nande,
arono naije maere kotaro anate muje mandayan.
21 Singa kamurame ukaririmbe wo maero wo raisye rakani,
maero Amisye Po ratayao mansamarome rakani.
22 Ranivara uma pare tipu seo, weamo singa unanajibe wakata no awa una ri rai,
wakata unakijo atentemo ukaokaibe raije rai.
23 Umba vatane wusya awa anakere rai,
wo awa anakere raijara ntoa namandi.
24 Wakoe! AMISY, Nya ana ndave manui rave,
Nyo anakotaro ranawayo no rai ranari Nya ana ndatantona ntiti rai,
weti mine so ntairi rai.
25 Waperata mayano manakoe muno ntanenae ratuije,
jiane muno anakotaro njaisyo rai, ama manui ratora marudi,
momoyainy muno akokoe ntuna njai rai.
26 Jiano saroe Nyo anari seo baono rai,
muno nyomano mayane ntovabe rai.
27 Anakotar tenambe so nao manaveano Akoe winamen,
indamu Nyo anaisye raunande mai arono wo ranajo.
28 Ranivara Winyo anaisye raude, weamo wo raugav,
muno ranivara winaneme rarorono mai, weamo umano Nya kove rai.
29 Weramu ranivara winakirive mai, weamo ujaniv dave,
muno ranivara Nyo manawayo akarimu, weamo wene mo maugav,
weti wenawamo wakasya ti ube kopave.
30 Weramu Winyo kovo wanyine raugakaje mine so rai,
weye arono rui Nyo nanawayoe raugaje, weamo mo anakotare inta ranari wanyimbe akato.
31 Syare indati AMISY Apa kovo ntiti no tawana ntoa nuge nuganui!
Muno syare indati AMISY anayanambe Apa anakotaro danari rai!
32 Po munije so raerade, weamo mungki nande rai,
muno pantukamo papukame raijamo kijao mpatututo rai.
33 Syare kinyo ransyerane raijo AMISY Ai arono ta rikov,
muno rikangkamambe sya Amisye aijo ransyerane rai arono ta rituna.
34 Amisye Po inanuga raveti ranayanambe,
weti ribeker syare risya syo AMISY atantona mo anayanambe raugavo Ai.
35 Syare koveamo vatano wo ayao kakai rave maumandita no mine vone so rai,
koveamo vatano wonae Amisy Ai muenen da maumandita.
Inya sya jugara, nyo AMISY ararimbe!
AMISY ararimbe!