105
Amisye ararimbe weye beto Apa urairi rai
1 Kove raura seo AMISY Ai, Apa tame rawain no wapa sambaya ama uga rai,
wapo Apa anakotaro Po rave ravovo susye kotaro mine so rai tenambe.
2 Wakiny wapo AMISY ararimbe, muno wapo ransyeran kangkaman raura seo Ai,
wapo Apa anainame kotaro Po rarorone ravovo tenambe.
3 Wasanuga manakoeve AMISY Ai weye Opamo dandinit dave,
syare vatan tenambe wasanayanambe, wasambayambe AMISY Ai.
4 Wamararai ta AMISY Ai, muno wapo anajo vambunine rai,
wabeaje Ai tutir, indamu tuna wasautan tutir.
5-6 Inya, Abraham wepi panapatambe AMISY Ai apa ajavi weap;
inya, weapi wasaura Yakop apa susye tavon,
wea tenambe AMISY Po wasatayao terave amarom.
Syare wasaemeno Apa anainame muno anapaporainyo Po rarorone rai,
muno mangke Po raugaje wama marova mai rai.
7 AMISY opirati wama Amisy,
Wepi Po ayao mamaisye rapatimu vatano mine tename so mansai mamaisyo awa ana udave rai.
8 Opamo aemen tutiro Apa urairi rai ntoa nuge nuganui,
teto rai tawano susyo mbakipambe iridito rai.
9 Po urairi so raokaisyo Abraham ai,
umba purairive panyoambe Isak ai.
10 Apa urairi wem, Po rapatimu akato irati Yakop ai,
indamu urairi we no tawano kawasae Israel mansai ntoa nuge nuganui.
11 Apa urairije no taiso: ‘‘Yakop, winyirati indati Risyo muni Kanaan raunande nai,
indamu susyo nyo rampam iridito awa ura rai tawan tutir.’’
12 AMISY purairive somamo arono apa kawasae Israel wenawamo
maisyare vatano maran una no munijo Kanaan ratuije,
awa wanui mamaun bayave.
13 Wuija uta no susye inta mai wakaujea uta no susye inta mai jakato,
wuija unanta no munije inta rai wakaujea uta no munijo kaijinta rai jakato.
14 AMISY Po mapaya vayave ramu, inda vatano kaije wo mansewabe inya,
Pare Po Apa kawasae mansayaranande, weti Po akari titi manayao.
15 Pare: ‘‘Vemo wapo Sya vatano Syo matayaowe mave tatugadi nora,
muno vemo wapo kakai rave Sya anawae mai jinya.’’
16 AMISY Po marore raugaje ntamijo muni Kanaan rai,
awa anaisye rakaniveta vintabo.
17 Weramu AMISY Po vatane inta apatimu po usyeve mai:
wepirati Yusup, amavunta be arove no Mesir.
18 No no makova wo ajo raugasya aitamu rai,
apa isyisye mamo poor besi raugasya nsawa rai.
19 Ndeve ava ana raurairive wusyimbe we mamaisy,
AMISY Po ayao Yusup po raura umaso raveti mamai dave kobe.
20 Akari titi Mesir po apa vatane matutir wo Yusup apaya no makova rai,
akarijo vatano Mesir we po apaya kobe.
21 Akari titi we po Yusup aijaseo be akarive no apa yavaruga rai,
muno panaveo ai indamu po apa anakotare raija nande tenambe.
22 Yusup po Mesir awa akari akokoe matutiro apa bekere rai,
muno po awa vatano matu manyao irati ana ratantona ntiti rai.
23 Umba Yakop, awain tavonamo Israel, poroto no Mesir,
muno apa yavaruga matavon, una no we maisyare vatano maran no munijo Ham umaso.
24 AMISY Po Apa kawasae Israel awa wanui raveti miridi nseo,
muno Po maveti ubambunin dave vatano Mesir makivan.
25 Wepi Po vatano Mesir maveti manuga mamuno Apa kawasae mansai,
weti wo Apa kawasae wanapatambe Ai maponae.
26 Umba AMISY Po Musa, wepi panapatambe Ai, atutir to no Mesir,
muno Po Harun atayao ti Po atutiro atavon.
27 Wenanai yo AMISY Apa anainame raroron no vatano Mesir awa yasyin,
muno Apa anapaporainye raroron no munijo Ham umaso rai.
28 AMISY Po ananamane raveti nande weti nuge ngkaumudi vintabo,
weramu vatano Mesir wanave Apa ayao rai ramu.
29 AMISY Po mana ntuna no Mesir ranigwan ti mavu vintabo,
weti jiane muenen bintabo.
30 Karavinane mo muni Mesir rayapu,
muno nsiso ti Akari Titi apa tanoane ntairi janyi.
31 Amisye Po raura, naije kobe abuu nde,
muno anyira nde tavon mo awa munije rayapu vintabo.
32 Amisye Po maru ranigwan ti nanayao dave weti mbe maru orambe maje,
muno Po ivake raveti ratatukande nuge rai vintabo.
33 Maisyare omaisy, Amisye Po awa angguri muno inyo ara rababari,
muno inyo ntuna no awa muni rabibiti vintabo.
34 Amisye Po raura, naije kobe kao mine nsen,
kao mino nsen wemainy awa wanuije mamo ratore kakai.
35 Wo anare kotaro ntubai no munijo Mesir raisy bintabo,
muno wo awa nawaisye ama ine raisy tavon ti mewen.
36 Amisye Po arikainyo anui Mesir mao tenambe vintabo,
weti awa vambunino arikainyo anui indamu mo yavaruga rampam iridito, mayondi.
37 Umba AMISY Po vatano Israel maugav uje munijo Mesir raora,
wo perak muno emasije inta raugav tavon,
wenao bintaboamo manakea nsauman muno ubambunin.
38 Vatano Mesir wo vatano Israel masyaniv dave,
weti arono vatano Israel wuje, vatano Mesir mananibe rave.
39 Amisy Po kamure raugaje ti ngkamajugambe irati vatano Israel mai,
muno Po taname raugaje ti mbaro mai no naman.
40 Wo AMISY anajo anaisye rai,
weti Po insani muno roti raugaje no naume warae, ti wo raisya uman dave.
41 AMISY Po oramo akoe raporar ti mana nsui uje rai,
umba njam maisyare mana akoe no anoko kanen.
42 Weye AMISY aemen tutiro Apa urairi rai,
namirati Po raokaisyo Abraham ai, Apa vatano panapatambeo Ai.
43 Arono Po Apa kawasae maugav uje, manayanambe rave,
weti Apa vatano Po matayao wenao, ukiny mananibe.
44 AMISY Po susye kotare awa kopa raunanto Apa vatano Israel mai indamu weyave rai,
muno wo vatano kaije awa nawaisye ama ine raugavo mamarom.
45 Wirati indamu Apa kawasae ubeta Apa anaparatote rai,
muno utavon irati Apa ananyao rai tutir.
AMISY ararimbe!