103
Syare syo AMISY ararimbe!
1 Masmur Daud po ratoe.
Inya sya jugara, nyo AMISY ararimbe!
Nyo Apa tamo ndandinite rararimbe nanuga ntenami rautan!
2 Inya sya jugara, nyo AMISY ararimbe,
mbemo nanimarijo Apa kovo Po rarorono nai rai jinya!
3 Opirati Po nya ayao kakai rapaya tenambe,
Opirati Po saumane raunande nai no waneno nande nai rai tenambe.
4 Opirati Po napaya irati atemo amanija rai,
muno Opirati aemeno nai ti Po naainyave irati Apa muinyo no tawane rai.
5 Wepirati Po nya mbekere raunande nai mamaisyo Apa kovo ngkov dave rai,
weti winyamo mbambunin muno nya kamurame no tawan, maisyare insanijo mangkakane amaisy.
6 AMISY Po ana mamaisy muno moyare raugaje,
Po raugaje irati vatano matawanto mai.
7 Po Apa bekere rarorono Musa ai to,
muno Apa ana dave rarorono kawasae Israel mansai to.
8 AMISY Opamo muiny dave muno aemeno wansai,
Opamo atawandi ngko dave muno Apa muinyo no tawane manakoe rave.
9 Opamo Po wansanayao tutire ramu,
muno pari wansai tutira ntoa nuge nuganui ramu.
10 Mangke daude mamo Po rataun mamaisyo wama ayao kakai rarijati ma jewena,
muno Po rasakinavo wansaija mamaisyo wama ana wandaveti ngkakai rai ramu.
11 Weye maisyare muno naumo ntanenae ti manakoeve warae wemaisy,
maisyare wemai tavon Apa muinyo no tawane mamo manakoeve rave vatano wo asyanive mai.
12 Maisyare wanamurame nggwaravain dave irati varete rai,
wama ayao kakai mamo Po raepata ti musyo marambe wansai.
13 Mamaisyo injae aemeno apa arikainye mansai,
maisyare wemaisy, AMISY aemeno Apa vatano wo asyanive mai.
14 Weye Po wansanari animaisye rai, Opamo Po raen to;
Po raen to, wamamo kopa ama waum bayave.
15 Vatane wanjaisye no ra nugoenta ramu yara wamaisyare insumai kavinta mayon akato,
maisyare kavasasi ama uge ngkenav vavai wemaisy,
16 ranivara ovare damawisyamo ama ugem umawe numu ti raumandi,
muno ama ava numu raije raene jewen.
17 Weramu AMISY Apa muinye no tawan irati vatano wo asyanive maija ntoa nuge nuganui.
Apa bekobe mamo ntami tawano awa ubakipambe iridi to mai tutir,
18 nanawirati wo Apa urairi Po raokaisyo mai raijaro matuve mai,
muno Apa anaparatote mamo ubeto rai tawane mai.
19 AMISY tuna no Apa kursijo ntiti rai no Manunggara,
Opamo be akari titive anakotare rai tenambe.
20 Inya, naito Amisye weap, wapo AMISY ararimbe,
weapirati Apa naito anaaniv wapo Apa ayao ranaun muno wabeta rai weap.
21 Inya, naito kotar ntuna no Manunggara wea tenambe, wapo AMISY ararimbe,
weapirati Apa naito wapanapatambe Ai ti wapo Apa bekere raveti mamaisye weap.
22 Inya, anakotaro Po ranari mainy tenambe, namirati no no anem ate rai no no rui rui vayave, wapo AMISY ararimbe!
Inya, sya jugara, nyo AMISY ararimbe!