102
Vatano kamuram no siuri rai apa ana danajo Amisye Ai
1 Vatano no siuri rai apa ana danajo Amisye Ai, arono anasine mayondi muno po apa siuri no no anuga raura to AMISY Ai.
2 Sya AMISY, syare Nyo sya ana danajo so raraniv,
syare sya anonae so more irati Winai.
3 Vemo winakirive rinai nora,
arono anakotare mo inakikipi.
Syare namarikoame rasakinavo rinai arono syo winawain,
Nyavave Nyo sya ana danajo ravera mamaisyo rinai.
4 Rikov ti no somamo nde nto ti rakanive, maisyare kijao wemaisy,
sya pae so raranitowa maisyare taname raon dai wemaisy.
5 Inanasine so ntarurandi, maisyare insumai mayone wemaisy,
muno inanuga syisyisye inta no ramu.
6 Syanonae akoeve,
weti umba inanasine somamo kea bo mo pae rakom.
7 Risyamo ribui tuna mumuimbe, maisyare insani tatekari una no umbuga rai wemaisy,
muno maisyare insanijo koo no no munijo vatane inta una rai jakato jewene wemaisy.
8 Risyamo niki kakai,
maisyare insani tuna mumuimbe no yavare tati wemaisy.
9 Namane rinit sya marova wo inaura tantunawi,
wo sya tame rave wanaamatambe vatane mai, ware indati awa siurije mo sya ramaisy.
10 Syo kapume obo ratukami asyo maisyare omirati sya anaisye mijem,
inami ngkaru nsororop ti masyo sya mana damaname rai,
11 weye wimpari mangkebe irati rinai.
Winyavakaje inai ti Nyo inandarito maisyare anaingkainye inta raepato wemaisy.
12 Rikove somamo indati raumandi maisyare uma pasyo ti sya ugara aumandi wemaisy,
risyamo mayondi maisyare insumai mayone wemaisy.
13 Weramu sya AMISY, Winyirati mbe akari titive ntoa nuge nuganui,
muno susyo miridi nto wo Nya tame raijaseo titive tawan tutir.
14 Indati taune mbeseo ra naemeno Sion rai,
weye ama masyote mi som indamu raijaseo mbambunin akato,
soamo ama masyoto Nyo rapatimu rai nande.
15 Weye Nya vatano Israel wanapatambe Naije onawamo mansanuga no awa yavaseno Sion rai,
mandamisyija mbe kampumbe to, weramu wenawamo mansaemeno rai.
16 Indati susye kotaro mine so wo AMISY asyaniv,
muno akari titi mine so wo Apa kovo ntiti rasyaniv.
17 Anakotare so nande arono indati AMISY Po Sion raijar akaeyo ntet akato,
umba Apa kovo ntiti raeno rai.
18 Opamo indati Po Apa kawasae awa ananuge meweno mai awa ana udanajo Ai raraniv,
muno Po awa ana udanajo Ai rawatambe ramu.
19 Koveamo Amisy Apa anakotaro Po rave umaso ratoe,
indamu ntami arikainyo mbeakaseo akato mansamarom,
muno susyo indati mansavaki akato nao wo AMISY ararimbe.
20 Weye AMISY tuna no munijo ntiti ndandinit muno peravaje,
nai Manunggara, Po munije so raen tenambe.
21 Indamu Po Israel wanonae siuri rai no munijo aroo ranaun.
Muno vatano mangke raugaje mai indamu maubaisye nawamo Po mapaya rai.
22-23 Weti arono indati susye kotaro mine so muno munijo vatane ube akarive rai
wangkuire tenambe indamu ubeaje irati AMISY Ai,
weamo wo Apa tame ravovo no Sion,
muno wo ararimbe no Yerusalem.
24 Amisye Po sya vambunine radaut arono ta rikamurame so,
muno Po sya tume ransopaje ti ntumainy.
25 Syo raura syare: ‘‘Sya Amisy, Winyi no pitawabe ntoa nuge nuganui,
syare vemo Nyo wene raugaje rinai kobe no ta ikamurame so inya.’’
26 Arono manasyin dave Winyirati Nyo mine so ranari,
muno Nyo naumo warae ranari tavon.
27 Weramu anakotare umaso indati rakanive vintabo, yara Winyamo no tawan tutir.
Mine so muno naume warae noa mbe wusyimbe to,
maisyare ansuno mbe wusyimbe to ramaisy.
Indati Winyo mine so me naume warae me yaepata,
maisyare ansuno mbe wusyimbe raepata ti rakanive wemaisy.
28 Weramu Winyamo mbe ninuwanive jewen,
Winya marane ntami intai jewen,
yara wino tawan tutira nuge nuganui.
29 Nya kawasae reama arikainye, ajavi miridi nto nawamo una mariraave,
muno una kovo saumane rautan no winanem uga rai.