10
Inan i nyám ntàn ûIsa̱rila
1 uIsa̱rila ìba̱ngba̱ng va á ɓyen pa̱ shat,
uza̱ i ná awar ishi wò pa̱ makmak.
Ka̱kul mmak awuwar te,
uza̱ myak atak nshì iya̱m awop.
Ka̱kul mɓyen iya̱m iga mbibin te,
uza̱ sham ìsham oga ala̱ka̱n ayə́ryər wò.
2 Ìgwak oza̱ i lam atak ǹyangmata̱,
nkpak pa̱ oza̱ á yar mpəpat.
UYawe i chwan atak nshì iya̱m ngwop
kang uza̱ i shin oga ala̱ka̱n oza̱ ayə́ryər.
3 Oza̱ kà̱ nlà pa̱, <<Í yà ká̱ uponzhi ka̱t,
ka̱kul i nəm ayər áYawe ka̱t.
Ká̱ í yà ká̱ uponzhi te,
iza̱ uza̱ ká̱ nəm á yi yà?>>
4 Oza̱ là oga nnap-nlà na pa mwang.
Oza̱ sóng anung ká̱ ǹyar nsar nnap-nlà ngga akwam,
te akwali fa wa ipəpà ìga akàl
ka̱ ashe ìram ìwapwap.
5 Ayər i nəm onəm oga ntəm ka̱ ashe aSamariya,
ka̱kul ìchər ivan ina iga aBet Ava̱n.
Onənəm ká̱ onəm oga mpyal awop i təm ká̱ aɗor ka̱kukul,
oza̱ i tán ka̱kul ìzhəzhan kap ká̱ oza̱ chit.
6 Mí yar mí ná imwa,
ûponzhi uchumchum uga aAshur ká̱.
Ìwuswa i yar uEfərayim,
ìwuswa i nəm uIsa̱rila ka̱kul ichəchen.
7 IPonzhi oga aSamariya i zhì,
wa akún ka̱ apal ndəng.
8 Mi zhì atak awop aga apal oga aɗuktum va̱ ka̱ aAva̱n,
atak va oIsa̱rila i nəm inga ka̱ á,
izú ká̱ nkpakshi, i rup ka̱ atak nshì iya̱m awop oza̱,
oza̱ i là ipáng ichumchum pa̱, <<Gún yi.>>
Oza̱ i là oga aɗuktum pa̱ <<Ó tàk ka̱ apal ishi yi.>>
9 <<óIsa̱rila, á ɓan ka̱ ashe oga nra aGibiyà
nnà o nəm nnap mɓá̱ngɓa̱ng.
Á ɓàn matmat kang mmawó kà̱ ngga mpyal ka̱ ashishe,
te ìkum mul oza̱ ka̱ aGibiyà ka̱t ɗò?
10 ÌLum i rwam te, mi nyám ntàn óza̱,
oga mbin i gwang ishi i lung oza̱,
ka̱kul mpyát oga nnap mɓá̱ngɓa̱ng oza̱.
11 UEfərayim wa ìya ìna ìva mmá ɗyang ntàn á na,
ìva fe nchang mpək ìpirkur,
kang n ná nfe nchang á na.
Te mi nak ayok aɗəkɗək kà̱ ishishak,
mi nak uYahudi pa̱ a dap ashan,
uYakup nnyi te, i dap ashan aga mbəbək.
12 Ó suk nnap nnəna̱n íshi wo
te ó ɓən mma̱n nva i kùr ka̱t.
O kà̱p oga mpom wo,
ka̱kul awalang aga nram uYawe nəm chit.
Na uza̱ a pəng,
nnap nnəna̱n ka̱ apal wo.
13 O shàng iya̱m inga
o ɓən mɓək anung.
O ri imwa nnáp akwam.>>
Ka̱kul o təp asəm kà̱ nkàm wo,
ká̱ ìyə̀l onəm ìkum ova̱ mmawó ká̱.
14 Ka̱kul nva̱ ta te, achu ìkum i ga ngwong
kà̱ ishimshe onəm wo.
Mí shin nkpaktak akamsəlang wo,
wa nva uShalman zhì aBet Arbel ka̱ alum ìkum,
kang onang ká̱ ovan tàk kà̱ mbin kú á.
15 Wa nnà ta mí nəm awo ónəm oga aBetel,
ka̱kul mmak inga wo.
Ká̱ iɓotak na byet te,
mí gba̱l uponzhi oga aIsa̱rila.