9
MPyát nva mí nəm oIsa̱rila ka̱kul nnandər oza̱ yə́l awo ka̱t
1 óIsa̱rila, kang o lan wa nva̱ mbín nro i lan ka̱t,
ka̱kul o nəm mmai chit o kap ká̱ Inan wo.
O ma̱n nnap amwa achar umaimai kà̱ nza̱ atak mpək ìpirkur nggo.
2 Atak mpək ìpirkur ká̱ atak nkáng ndəng ìba̱ngba̱ng ǹsámsàm i ri ká̱ oza̱ ka̱t,
kang ndəng ìba̱ngba̱ng ncángchàng i yen oza̱.
3 Oza̱ i təm kà̱ mbin àYawe ka̱t.
Ka̱ɗor nva̱ ta te, uEfərayim i le aMasar,
kang oza̱ i ri iya̱m-nrì ivyapvyap ka̱ aAshur.
4 Oza̱ i ná imwa ndəng ìba̱ngba̱ng ǹsámsàm ûYawe ka̱t,
kang nləfər iya̱m ipápà oza̱ i ná nchang ìgwak á na ka̱t.
Nləfər oza̱ i yà wa nzənkəng onəm oga ǹyə́ng ikú,
nkpaktak onəm va̱ i ri te, i nak oza̱ i vyap.
Nzənkəng oza̱ i yà ka̱kul ayang afu oza̱,
i tar ashe nzhi àYawe ka̱t.
5 Iza̱ o nəm kà̱ ìlum ìnaknak ìga nnəm nchang izər,
kà̱ ìlum ìga nri ká̱ ngwa àYawe yà?
6 Kang a yà pa̱ oza̱ a chəng ka̱ atak nzhì te,
aMasar i ɓut oza̱, kang aMop i li oza̱.
Mí wur iya̱m akúp ká̱ aazurfa oza̱,
izú i fa ka̱ ashe aghal oza̱.
7 Ìlum iga nnyám ntàn ɓa chit,
ìlum ìga mmumwa ɓa chit. Re oIsa̱rila a nyi.
O là pa̱, <<Unəm uga nlà ìchu Inan mpərək,
kang unəm uga aruhu á swa nggatswa nggat,>>
ka̱kul mmák mpat ká̱ ǹyang nva̱ o yang mi.
8 Unəm uga nlà ìchu Inan ka̱ atak nka̱mshi Inan,
uwa unəm uga mpángchí uEfərayim,
káp ká̱ nnà te ajəp ánəm uga ngba̱l ìzhe gáng na,
mí yang na kpa ka̱ ashe nzhi ìNənan.
9 Oza̱ gbà̱ng chit ka̱ ashe nlàng nnəm nnandər
wa nva ka̱ ashe nra aGibiyà.
UYawe i rəng nnap mɓá̱ngɓa̱ng oza̱,
kang i nyám ntàn óza̱.
10 Nva̱ ka̱ n yak uIsa̱rila te, uza̱ wa awar ìba̱ngba̱ng ka̱ ashe anyin.
N ya okəka wo wa awar aga nggəshi ka̱ izər ìpipyan ka̱ ashe nrəra.
Oza̱ ɓa aBaal Piyo te,
oza̱ gar ishi oza̱ îchə̀r.
Kang oza̱ təm iya̱m iga nnəm ajan wa ìchər va oza̱ ma̱n.
11 Ìzhàn aEfrayim i wong i ga wa ìnyil,
amar, ntəm ká̱ anyám, ká̱ ǹyar anyám i yà ka̱t.
12 Kang a yà pa̱ oza̱ a kang ovan oza̱ te,
mi nak oza̱ i lang nza̱ uzəngtəng nggo.
Álak ká̱ oza̱ chit, nva̱ngva̱ mi re oza̱ ká̱ nkùkwa á.
13 N ya uEfərayim wa aTaya,
mmá suk ka̱ ashe atak anəna̱n.
Te uEfərayim i fa ká̱ ovan wò ka̱kul nzhì.
14 Ná óza̱ áYawe, iza̱ màl pa̱ ú ná yà?
Ná afu aga ǹwak ká̱ mbyal ngga ǹyà ká̱ ndəng ka̱t.
15 Nkpaktak inga oza̱ nyám ka̱ aGilgal,
n yang oza̱ ka̱ ta ka̱kul nnap nnəm oza̱ ǹngha.
Mi ɓàk oza̱ i fa ka̱ ashe nzhi mi,
mi ma̱n oza̱ lap ka̱t.
Nkpaktak onəm oga mpyal oza̱,
onəm oga nfa iya̱mkak .
16 Mmá tul uEfərayim chit, alə̀ng oza̱ wom,
oza̱ i mar ovan lap ka̱t.
Kang a yà pa̱ oza̱ a mar te mi gbá̱ng,
iya̱m inəna̱n iga afu oza̱ áta.
17 Inan mi yang oza̱,
ka̱kul oza̱ gwong achwang kà̱ na ka̱t,
te oza̱ i yà onəm rá nggangra nggang ka̱ ashe oga mbin.