11
MMa̱n Inan ka̱kul áIsa̱rila
1 Kà̱ ìlum va̱ uIsa̱rila ka̱ yà uyen te, m ma̱n na,
kang ka̱ ashe mbin aMasar nà n wór uyen mi fa.
2 Mi yà kà̱ ngwór oza̱ te,
i dong oza̱ kà̱ nchəng atak mi.
Oza̱ ga mpyal ká̱ nná nləfər oga ìchər aBaal,
kang oza̱ i dung oga îchə̀r.
3 Mmami na kà̱ nɗyang achen uEfərayim
n kpán oza̱ ká̱ awo mi.
Ká̱ nnà te, oza̱ nyi pa̱
mmami na n tàn oza̱ ka̱t.
4 N kpak oza̱ ká̱ nrwa ìgwak
ká̱ asang aga mma̱n.
Mmami wa ánəm ùva̱ yar ayok kà̱ ishak oza̱,
kang n kúchi n ná iya̱m-nrì óza̱.
5 Oza̱ i le mbin aMasar,
kang aAshur i təm uponzhi oza̱,
ka̱kul oza̱ yang ká̱ ngga̱ɓa̱n asəm n̂nap mɓá̱ngɓa̱ng.
6 Ǹdokchi i kandar kà̱ ìtong oza̱,
i chwan oga anung asa̱l ìtong oza̱,
kang i ri oza̱ ka̱kul ichən oza̱ inga.
7 Onəm mi yar pa̱ o ga̱ɓa̱n o re mi.
Oza̱ kà̱ ngwór atak achumchum,
kang i yà ká̱ ǹrup ká̱ oza̱ ka̱t.
8 Wa ǹsang mi kap ká̱ ɓu yà, aEfrayim?
Wa ǹsang mi na ɓu ka̱ atak ro yà, áIsa̱rila?
Wa ǹsang mi na ɓu wa aAdima yà?
Wa ǹsang mi nak ɓu wa aZeboyim yà?
Ìgwak mi ga̱ɓa̱n chit,
kang ǹrusok afu mi chi izər.
9 Mi yà ká̱ nnəm inok ká̱ nlak ìgwak mi ka̱t,
mi zhì uEfərayim lap ka̱t,
Ka̱kul mmami Inan, unəm ka̱t,
uNəna̱n, kà̱ ishimshe wo
mi ɓa ka̱ ashe ǹfə́l ìgwak ka̱t.
10 Oza̱ i yar nva̱ng àYawe,
uza̱ i ɗum wa ìlir.
Kà̱ nva̱ngva̱ uza̱ i ɗum te,
ovəvan i ɓa ká̱ nchəng ka̱ asa̱l ntar alum.
11 Ká̱ ngha̱n oza̱ i ɓa wa ìnyil ka̱ aMasar,
kang wa ìləkpar kà̱ mbin aAshur.
Te mi nak oza̱ i təm kà̱ nzhi oza̱,
uYawe à là.
12 UEfərayim gáng mi ká̱ akwam,
kang nzhi àIsa̱rila ká̱ nlàm atak.
UYahudi te, kà̱ nránggang ká̱ Inan,
kang uza̱ ká̱ nnandər ûNəna̱n.