45
Lagu i Wakutuuna Kawiana Raja
45:1-18
1 To kapalana molaguna. Aose lagu: Kamba-kamba Bakung. Zaburuna miana Korah. Laguna kaadhari; laguna kaasi.
2 Ngangarandaku abukeaka tee manga lagu makesa.
Iaku bhekulaguaka laguku to raja,
dhelaku mboomo folupenina samia juru tulisi momakidha.
3 Ingkoo momangadana i tanga-tangana umane,
kalapemu atokamata minaaka i pogaumu,
sababuna sumai Aulataʼala abarakatiko to saʼumurua.
4 Bhokea o ewangamu i tangamu, e raja mobarani,
ingkoo momalangana tee momuliana!
5 I nuncana kamuliangimu sumai usawikimo karetamu tee ukanamo,
to kabanara, sifatuna mia inda mosombo, tee kaʼadili!
Taroakamo lima kaanamu akarajaa pewauna motomaeka.
6 Anana panamu amatadha,
alosa i bhakena manga musumu,
manga lipu akotibu i aroamu.
7 Kauncuramakamu, e Aulataʼala, sadhaadhaa torotorosu tee saʼumurua,
tee o katukona pamarintamu satotuuna o katukona kabanara.
8 Ingkoo umaasiaka kabanara tee ubanci mia madhaki.
Sababuna sumai, Kawasana Opumu, Aulataʼalamu, padhamo alantiko umembali raja
tee apasanaako alabhi minaaka i raja mosagaanana.
9 Bhari-bharia pakeamu akobhou mina-mina mawondu mboomo polona damar, garu, tee asana.
Ingkoo umasanaa urango suarana kecapi tee gambusu minaaka i maligemu motobhelokiakana gadhi.
10 I tanga-tangana manga bhawine molaianiko dhaangia tee manga bhawine o anana raja.
I weta kaanamu akabhale-bhale o ratu mopakena kabheloki bulawa momalape minaaka i Ofir.
11 Perangoiaku pekalape, e kabuabua, kamatea tee utaaia o talingamu!
Malinguakamea o lipumu tee bhanuana amamu.
12 Taroakamo o raja apeeluko roonamo umakesa!
Incia o opumu, sujumo uhoromatia.
13 Raʼeatina kota Tirus bheabhawaakako pasombaa,
tee manga mia morangkaea bheaʼusaha to aala-ala incamu.
14 Anana raja bhemokawina tee rajana Israel apesua i nuncana maligena,
pakeana kabuabua sumai abukeaka kasokai bulawa.
15 Incia bheatoʼantara i raja tee pakea motosokai,
apoose tee manga sabhangkana,
siitumo manga kabuabua molaianina anana raja.
16 Manga incia atoʼantara tee asambo-sambo tee akaunde-unde,
manga incia apesua i nuncana maligena raja.
17 E raja, manga anamu bheabholosi opu-opuamu,
ingkoo bheuangkea manga to amembali kaogesa i saangua alamu.
18 Iaku bhekupewau saromu amaoge tee bhari-bharia ipewaumu audhania mia sii-sii sakawana i aaherati,
sabutuna bhari-bharia lipu bheapuji-pujiko torosu saʼumurua.