46
Aulataʼala o Kotana Benteta
46:1-12
1 To kapalana molaguna. Laguna miana Korah; alaguakea tee suara momalanga.
2 Aulataʼala sumai o tampana peulusata tee o kakaata.
Incia sadia amakasu to manga tulungi i wakutuuna kaseke.
3 Sumaimo ingkita inda tamaeka, moomini o alamu akolendu,
moomini manga gunu atondu i nuncana tawo,
4 tee moomini o tawo akomburu tee akobura
tee manga gunu akohudha rampaakanamo akangkanaia ewona tawo sumai.
Sela
5 Dhaangia manga siwuluana uwena umala aumbaaka kaunde-unde to raʼeatina kotana Aulataʼala,
siitumo o tampa momangkilo, mbooresana Aulataʼala Momalanga.
6 Aulataʼala amboore i tanga-tangana kota sumai, sabutuna o kota sumai inda bheakohudha.
Aulataʼala bheatulungia wakutuuna akawa raneeo.
7 Manga raʼeatina lipu atobungke tee manga pamarintana abagoea,
rampaakanamo Incia aparangoaka suarana, alamu ahancuru.
8 KAWASANA OPU, kapalana saangua pasukana sorogaa, apoose tee ingkita,
Aulataʼala isombana Yakub siitumo o kotana benteta.
Sela
9 Mai, kamatea opea ikarajaana KAWASANA OPU,
Incia apewau giu inda momentela i alamu!
10 Incia apaunto potimbea i saangua dunia,
pana apahancurua tee pandanga akatukia,
Incia atunu manga kareta potimbea tee waa.
11 Firimanina, "Untomo upoewangi, mataumea ande Iaku sii o Aulataʼala!
Manga lipu bheapekalangaaku,
tee saangua alamu bheamuliangiaku."
12 KAWASANA OPU, kapalana saangua pasukana sorogaa, apoose tee ingkita,
Aulataʼala isombana Yakub siitumo kotana benteta.
Sela