44
Pekidheina Lipu Motopisaki
44:1-27
1 To kapalana molaguna. Zaburuna miana Korah. Laguna kaadhari.
2 E Aulataʼala, ingkami padhamo tarangoa.
Opu-opuamami padhamo manga petulatulaaka
giu mopadhana ipewaumu i zamanina manga incia,
siitumo i zamani mangenge.
3 Ingkoo upadhencu manga lipu mosagaanana tee limamu karomu,
kasiimpo upamboore opu-opuamami to kabholosina manga incia.
Ingkoo upahancuru manga lipu,
maka utaroakea opu-opuamami ajulu o kabharina.
4 Manga incia inda apoewaangiakea to apotibhaaka tana incia sumai,
mencuana tee limana manga incia imembaliakana akana,
maka tee lima kaanamu tee kuasamu,
tee caheana roumu
roonamo Ingkoo umaasiaka manga incia.
5 E Aulataʼala, Ingkoomo Rajaku,
mopamembalina miana Israel akana.
6 Tee kuasamu ingkami tapadhencu musumami,
tee saromu, talandalandaki manga mia bhemoewangina ingkami.
7 Mencuana panaku itangkaakaku,
hancuku uka inda apasalaamatiaku.
8 Maka Ingkoomo mopasalaamatina ingkami minaaka i bhalimami,
tee upekaea manga mia mobancina ingkami.
9 Roonamo Aulataʼala, ingkami sadia talaguaka lagu kapujia,
tee saromu, ingkami bhetasukuru saʼumurua.
Sela
10 Maka sii-sii Ingkoo manga bholimo tee manga taroaka tamaea.
Ingkoo indamo umaju uka upobhawa tee tantaramami.
11 Ingkoo manga taroaka tapalai minaaka i musumami,
tee manga mia mobancina ingkami arampasi harataamami.
12 Ingkoo manga pasarakaaka mboomo dumba isumbele,
tee manga papogaa-gaa i lipu mosagaanana.
13 Ingkoo uaso uumatimu inda tee haragaana i musuna to amembali bhatua,
tee inda uala laba saidhe uka.
14 Ingkoo utaroaka ingkami mangahina manga lipu sarimbanuamami,
tee tamembali kaele-elena manga mia i saripimami.
15 Utaroakea manga lipu apotawaiki ingkami.
Manga incia alengko-lengko bhaana to ingkami.
16 Saeoa kutohina,
tee kutanggo kaeaku,
17 roonamo kurango kaele-ele tee kahina
minaaka i musumami tee manga mia modhikaakana bukuna incana tee ingkami.
18 Bhari-bharia sumai padhamo akangkanai ingkami
maka ingkami inda tamalinguakako
atawa tahianati janjimu tee ingkami.
19 Incamami inda abhalii minaaka i Ingkoo,
tee ingkami inda tabholi o kaadharimu
20 moomini Ingkoo padhamo upahancuru ingkami i tampana serigala,
tee udhika ingkami i nuncana kalalanda.
21 Ande ingkami tamalinguaka sarona Aulataʼalamami,
atawa tadoʼa tee tasomba i Aulataʼala mosagaanana,
22 Aulataʼala dhaanamo bheamataua,
satotuuna Incia amataua o rahasiana ngangarandamami!
23 Saeo-saeo ingkami taaro mate rampaakanamo taose tee tataʼati i Ingkoo,
tee ingkami tatoabhi mboomo dumba isumbele.
24 E Aulataʼala, pewaumo. Pokia Ingkoo mboomo ukole?
Pewaumo! Bholi manga umendeu saʼumurua.
25 Pokia Ingkoo ubuniaka karomu
tee umalinguaka kanarakaa tee kapisakimami?
26 Ingkami takotibu i nuncana ngawu,
tee o badamami akumbu i tana.
27 Pewaumo tee tulungimo ingkami!
Roonamo kaasimu molagina, manga tolosi!