3
Ulonzi kwa wana
1 Mwana wa heni, uleche kusemwa malanguso ga heni,
kwa nhumbula ya hegwe wibatilile mizilo ja heni.
2 Kwa vila vyokupa winji wa mazuwa,
na kikala lukami na mbuli za hegwe zolutilila goya.
3 Igano lya kwimilila na kukundigwa vileche kuwa kutali na hegwe.
Uvibate mmoko ga hegwe,
na uvyandiche mnhumbula ya hegwe.
4 Ahyo kowa na uganililo na kutogoligwa,
hali Nguluwi na hali wanhu.
5 Witumbile kwa Mkulu Nguluwi kwa nhumbula ya hegwe yeng'ha,
uleche kitumbila nyhala za gwegwe baho.
6 Umkumbuchile Nguluwi kuli chila choulingudita,
heye kozigolola nzila za hegwe.
7 Uleche kiwona gwegwe baho kota kuna luhala,
umdumbe Mkulu Nguluwi na kiwika kutali na wihe.
8 Avyo vyowa mikwandi mlukuli lwa hegwe,
na chihewezo mli mizeje ja hegwe.
9 Umhulichize Mkulu Nguluwi kwa lufufu lwa hegwe,
na kwa kufunya kwa chilyo cha hegwe cheng'ha cha mwaluko.
10 Ahyo ng'hano za hegwe zomema nyhule,
na mibiga ja hegwe jomema divai inyale.
11 Mwana wa heni, uleche kubeza kuzapigwa na Mkulu Nguluwi,
na uleche kuzudila kwa makanyo ga heye,
12 kwa vila Mkulu Nguluwi kangumkanyaga yula yalingumgana,
kota mhaza vyoyalingumkanya mwanage yalingumgana.
Nakatambichizwa munhu yawele na luhala
13 Nakatambichizwa munhu yula yalingulufichila luhala,
yalingupata kuvizela.
14 Luhala ndo chinhu chinojile kusinda sendi,
chinoga ng'hatu kusinda zahabu.
15 Luhala ndo lunoga ng'hatu kusinda johali,
kuduhu choulingugana choweza kiwhana nayo.
16 Kwa moko wa heye wa kudilo luhala lolavya kikala lukami,
kwa moko wa heye wa kumoso lolavya lufufu na lutogo.
17 Nzila za luhala ndo za kunojeza,
zeng'ha zanguluta kuli kikala goya.
18 Luhala ndo igodi lya ukomu kwa weng'ha walingulipata,
wangutambichizwa weng'ha walingikala habehi na alyo.
19 Kwa luhala Mkulu Nguluwi nakawika msisi wa isi,
kwa nyhala nakawimiza nzinzili ulanga.
20 Kwa uwanzi wa heye nakambuza nzanda kuchililika,
na ng'hungugu nazilagaza nungwi.
21 Mwana wa heni, wibatilile luhala na kwamula goya,
uleche kuvileka vyuche kumeho kwa hegwe,
22 vyowa ukomu kwa hegwe,
na inoligo linojile msingo ya hegwe.
23 Aho, koweza kuluta kwa kikala goya,
mgulu wa hegwe hauchikwang'hwala.
24 Wone uwase haudumba,
houwasa kowa na usinjizi unonile.
25 Uleche kudumba kwa chiwalo cha kukabuswa kwa kutinhusa,
ne kutowigwa hamwe na wehile,
26 kwa vila Mkulu Nguluwi ndo yowika utumbilo kwa hegwe,
kokwamila leka mgulu wa hegwe uleche kugwilizwa.
27 Louwa na ludali,
uleche kulema kumha yalingugana utanzi.
28 Uleche kumlonjela munhu yomlingikalasa habehi,
“Uye hamba, ndokupa mitondo,”
kuno hegwe kuna ludali lwa kumha choyalingugana, lehano.
29 Uleche kijesa kudita gehile kwa munhu yomlingikalasa habehi,
yalingikala na hegwe ne lunhwinhwi.
30 Uleche kilewa na munhu ne chiwalo,
wone hakuditile chinhu choneche chila chihile.
31 Uleche kumonela fihi munhu yawele na nhumbula yihile,
ne kwiga madito ga heye,
32 kwa vila wajilile ndo izudizo kwa Mkulu Nguluwi,
ila heye kanguwaditaga goloko wa heye, wala wawele wagoloche nhumbula.
33 Mkulu Nguluwi kanguzipanjilaga ng'handa za wanhu wehile,
ila kanguhatambichizaga haluga ha watanganiche.
34 Heye kanguwabezaga walingubeza,
ila kanguwapaga uganililo walingunyenyetela.
35 Wawele na luhala wobeta lutogo,
ila wasowile nyhala wopegwa soni.