2
Chonolo cha luhala
1 Mwana wa heni, ukunde ulonzi wa heni,
na kukumbuchila malajizo ga heni.
2 Uliwiche goya ikutu lya hegwe kuhulichiza luhala,
na kuidita nhumbula ya hegwe iwe na kuvizela.
3 Ena, kolanda upegwe luhala,
kodedeza upegwe kuvizela.
4 Kopala luhala kota sendi,
ama kota ng'hano ivisigwe.
5 Kwa kudita ahyo, kovizela kumdumba Mkulu Nguluwi ndo choni,
na kopata mana ya kumzela Nguluwi.
6 Kwa vila Mkulu Nguluwi kanguwapaga wanhu luhala,
kumlomo kwa heye kwangulawaga uwanzi na kuvizela.
7 Kanguwawichilaga walingumhulichiza ng'hano ya luhala,
heye ndo ngawo kwa wanhu walingikala kwa kugoloka.
8 Kangwamilaga madito ga wanhu walingudita hachi,
na kuzilolela goya nzila za walingukundigwa wa heye.
9 Aho ndo kolizela lyakohi litanganiche na lya hachi,
kovizela ndaze vyouweza kuleka uganililo na kuwinza chila nzila inojile.
10 Kwa vila luhala lwokwinjila mgati mwa hegwe,
na uwanzi woinojeza nhumbula ya hegwe.
11 Nhaguso zinojile zokwamila,
kuvizela kokulolela goya,
12 vyokulohola kulawa kuli nzila yihile,
na wanhu wawele na ulonzi wihile,
13 walinguleka nzila zigoloche,
leka kuziwinza nzila za jiza.
14 Wala walingusangalala kudita gehile,
na kunojezwa kwa kwajilila,
15 wawele madito ga hewo nagajilila,
na azo nzila za hewo zilinguhada.
16 Luhala lokudita uwe kutali na mdala mng'hondwa,
kulawa kwa mdala mng'hondwa na ulonzi wa heye wa uhadi,
17 mdala yalingumleka mlume wa heye wa kuli usongolo,
na kulisemwa ilagano lya Nguluwi wa heye.
18 Ng'handa ya heye yanguluta kuli isi ya wabagame,
na nzila za heye kuli kubagama.
19 Yoneche yalingumlutila, ndikomya halinguhiluka hebu,
ne kuhiluchila kahi kuli nzila ya ukomu.
20 Ahyo, hegwe kowinza kiwhana kwa wanhu wanojile,
na kibatilila nzila za watanganiche.
21 Kwa vila wagoloche nhumbula wochikala kuli isi,
na walihela nongwa wosigala mgati mwake.
22 Ila wehile wokusigwa kuli isi,
na wawele na nhumbula zihile wolavigwa amo.