4
Malanguso ga luhala kulawa kwa mhaza
1 Wana wa heni, mhulichize malanguso ga mhaza wa hemwe,
mhulichize goya leka muwe na nyhala.
2 Ndanguwapa malajizo ganojile,
ahyo mleche kulema malanguso ga heni.
3 Heni kahi nandali mwana yawele na mhaza,
nandali chali na mwana wa udewele wa mayangu.
4 Mhaza wa heni nakandangusa chinhu achi,
“Wibatilile kwa nhumbula yeng'ha ulonzi wa heni,
na mizilo ja heni, nagwe kochikala.
5 Wiholele luhala, wiholele kuvizela,
uleche kuusemwa ne kuugaluka ulonzi wa heni.
6 Uleche kumleka luhala, naye kokulolela,
umgane, naye kokwamila.
7 Luhala ndo lunoga kusinda vinhu vyeng'ha,
lelo, wiholele luhala,
ulavye vyeng'ha vyouwelenavyo, wiholele nyhala.
8 Umone luhala kota ka chinhu chitanganiche ng'hatu, naye kokulolela,
wone umbatilile kokupa lutogo.
9 Kokuvaliza chipembelo chinojile kumutwi kwa hegwe,
kokupa itaji linojile.”
10 Mwana wa heni, uhuliche na kuubochela ulonzi wa heni,
leka uwe na miyaka minji ja kikala.
11 Ndangukulangusaga nzila ya luhala,
ndangukulongozaga kuli nzila igoloche.
12 Houjenda magulu ga hegwe hagolemezwa,
houbilima hauchikwang'hwala.
13 Wibatilile malanguso ga luhala na uleche kumleka yasulupuche,
umbatilile goya kwa vila heye ndo ukomu wa hegwe.
14 Uleche kiyinjiza kuli nzila ya wehile,
uleche kuwinza madito ga hewo.
15 Wiwiche kutali na nzila ayo ne kuihejelela,
wiyuse na ayo, wuche.
16 Wehile hambe wawase wone hawaditile wihe,
hawawaga na usinjizi ne kumditila vibi munhu,
17 kwa vila wihe ndo chilyo cha hewo,
nhumbula zihile ndo divai ya hewo.
18 Nzila ya wanhu watanganiche ndo kota lumuli lwa lufuku,
lulingupulika lukami mbaka nemisi,
19 ila nzila ya wehile ndo kota jiza totolo,
hawavizelele chilinguwadita wekwang'wale.
20 Mwana wa heni, uhulichize goya ulonzi wa heni,
uwiche goya ikutu kuli nhelo za heni.
21 Uleche kuvileka vyajilile hali meho ga hegwe,
uviwiche goya mgati mwa nhumbula ya hegwe,
22 kwa vila avyo ndo ukomu kwa munhu yalinguvipata,
ndo mikwandi kwa lukuli lwa heye lweng'ha.
23 Mzidi wa ago geng'ha, wamile goya nhumbula ya hegwe,
kwa vila ayo ndo mwaluko wa ukomu.
24 Wiwiche kutali na ulonzi wa udesi,
na mlomo wa hegwe uleche kulonga mbuli za uhadi.
25 Meho ga hegwe galole kulutila kumwando,
uwe ulola kumwando yeka.
26 Wijese nzila youihola,
goulingudita geng'ha gowa genele.
27 Uleche kuhinduka kudilo ne kumoso,
uwiche mgulu wa hegwe kutali na wihe.