18
Mika na nhanzi ya Dani
1 Mazuwa ago nakwali haduhu mndewa kuli isi ya Isilaeli na kahi nhanzi ya Dani nawepalila uhalizi leka wawe na honhu ha kikala, mina nawali wang'hali kubochela uhalizi wa hewo hali nhanzi ya Waisilaeli.
2 Lelo wanhu wa Dani nawalajiza wanhu wahano kulawa wanhu weng'ha wa nhanzi ya hewo, wanhu wezidahe kulawa Sola na Eshitaoli, leka kuipugajiza isi ayo na kuikagula. Nawawalonjela, “Lelo muche mkaikagule isi ayo.” Lelo nawafika isi ya vidunda vya Efulaimu mbaka ng'handa ya ayo Mika, nawawasa ako.
3 Lowawele habehi na ng'handa ya Mika, nawatang'hula kulonga kwa ayo msongolo Mlawi kota ka mjenzi, aho ndo nawagaluka na kumuuza, “Ndaze, munhu whaani yakugale hegwe kuno? Kwangudita choni hano?”
4 Naye nakawalonjela, “Hino ndo vyoyalingunditila Mika, ndangumkolela mijito, nani ndiwa mtambika wa heye.”
5 Nawo nawamlonjela, “Dedede, umlande Nguluwi wone kotutambichiza tovizela kota nzila yotulinguluta yowa goya.”
6 Mtambika nakawalonjela, “Goya, muche kwa kikala goya, mina nzila yomlinguluta nayo ya hali Mkulu Nguluwi.”
7 Aho ndo wala wanhu wahano nawoka, nawafika Laisha, nawawona wala wanhu wowawele mgati mwake, ndaze vyowali wekale kwa kikala goya kota vyochiwele chihendo cha Wasidoni. Nawali wesindamale na walihela lunhwinhwi na hambe wapunguchilwe na choneche hali isi. Nawo nawali kutali na Wasidoni, nawali hela ilagano lyoneche na wanhu wanji.
8 Hamba nawawawinza wang'holozawo ako Sola na Eshitaoli. Wang'holozawo nawawauza, “Lelo mna mbuli yachi?”
9 Hewo nawalonga, “Mwinuche lelo, tuche kitowa na hewo mina tuyona ayo isi inoga ng'hatu. Ndaze, hemwe hambe mdite chinhu choneche? Mleche kuwa wagata kuluta na kwinjila leka muihole ayo isi.
10 Homluta ako mowafika wanhu walingikala kwa kikala goya. Isi ndo ng'hulu na Nguluwi nakaiwika kuli moko ga hemwe, ndo honhu hawele hambe hesilwe chinhu choneche.”
11 Lelo nawalawa wanhu wa nhanzi ya Dani miya sita wawichigwe goya kitowa ngondo, kulawa Sola na Eshitaoli.
12 Nawaluta kuwika kambi ya hewo ako kolizinjilaga isanya mwa Kiliati-yealimu kuli Yuda. Kwa chiwalo acho nawahachema honhu aho Mahane-dani mbaka lehano.
13 Nawo nawakola ako mbaka kuli isi ya vidunda vya Efulaimu, nawafichila kuli ng'handa ya ayo Mika.
14 Aho ndo wala wanhu wahano walutile kuipugajiza isi ya Laisha nawawalonjela wang'holozawo, “Ndaze, hemwe mvizela kota mgati mwa ng'handa ayi mna chizibao na limalukolo lya kuhongola na limalukolo lya kuponda na jimalukolo jinji? Lelo mijese choni chomlinguganigwa kudita.”
15 Lelo nawagaluka na kuluta ako, nawafika hali ng'handa ya ayo msongolo Mlawi, haluga ha Mika na kumlamsa.
16 Wala walume miya sita wawichigwe goya kitowa ngondo, wawele ndo wanhu wa nhanzi ya Dani, nawema kuli honhu ha kwinjilila, hali lwizi lwa lugagala.
17 Wala wanhu wahano walutile kuipugajiza yila isi, nawakwina kuchanya, nawenjila mgati na kulihola lila limalukolo lya kuhongola na chila chizibao na lila limalukolo lya kuponda na jimalukolo jinji. Ayo mtambika nakema hali honhu ha kwinjilila, hali lwizi lwa lugagala hamwe na wala wamizi miya sita.
18 Hala lowenjile mgati mwa ng'handa ya Mika na kulihola lila limalukolo lya kuhongola na chila chizibao na limalukolo lya kuponda na jimalukolo jinji, ayo mtambika nakawauza, “Mwangudita choni hemwe?”
19 Nawo nawamlonjela, “Winyamalile hegwe. Wiche moko ga hegwe kumlomo kwa hegwe na uche hamwe na hetwe leka uwe kwa hetwe mhaza na mtambika kahi. Ndaze, iwa goya kwa hegwe kuwa mtambika kwa munhu yumwe ama kuwa mtambika kwa chiwalo cha wanhu wa nhanzi imwe ya Isilaeli?”
20 Nhumbula ya mtambika ayu naisangalala, naye nakachihola acho chizibao na jila jimalukolo na lila limalukolo lya kuhongola, nakaluta hagati ha wala wanhu.
21 Lelo nawagaluka na kuluta. Ila wana wa hewo wadodo na migongolo ja hewo ja kufujigwa na vinhu vya hewo nawavilongola kumwando kwa hewo.
22 Nalowalutile kutali na ng'handa ya Mika, wala wanhu wawele kuli ng'handa ziwele habehi na yila ng'handa ya Mika, naweting'hana na kuwawinza wanhu wa nhanzi ya Dani, nawawafika.
23 Nawawatowela iyowe wanhu wa Dani. Wanhu wa Dani nawagalusa kumeho kwa hewo na kumlonjela Mika, “Kuna choni hegwe mbaka nakuya na nhing'hano kota ayi?”
24 Mika nakawalonjela, “Hemwe namjihola milungu ndijigongomanye na mumhola kahi ayo mtambika na kuluta, nani ndina choni kahi? Lelo iwa ndaze hemwe kumbuza heni, ‘Kuna choni hegwe?’ ”
25 Wala wanhu wa nhanzi ya Dani nawamlonjela, “Hatulingugana kahi kuhulika lizi lya hegwe, leka wanhu wawele wazudile ng'hatu waleche kukutowa na hegwe kubagama hamwe na wanhu wa haluga hako.”
26 Lelo wanhu wa nhanzi ya Dani nawaluta. Mika navyoyawene kota wala wana mong'ho lukami, nakagaluka na kuhiluka haluga ha heye.
27 Wala wanhu wa nhanzi ya Dani nawahola chila chinhu choyagongomanye Mika na kumhola mtambika wa heye kahi. Nawafika Laisha kwa wanhu wowawele wochikala kwa kikala goya na walihela lunhwinhwi, nawawatowa wala wanhu kwa ipanga na kuulakaza kwa chiluli muji awo.
28 Nakwali haduhu munhu wa kuwalohola kwa vila muji awo nawali kutali ng'hatu na Sidoni, nawo nawali hela ilagano lyoneche na wanhu wanji. Muji awo nawali kuli ibindi alyo liwele habehi na Beti-lehobu. Nawo nawauzenga muji awo na kikala amo.
29 Nawauchema muji awo Dani, kwa kuliwinza itagwa lya mhaza wa hewo Dani, yawele mwana wa Isilaeli. Ila itagwa lya muji awo aho hamwande, nalyali Laisha.
30 Hamba, wanhu wa nhanzi ya Dani nawemizila alyo limalukolo lya kuhongola, naye Yonatani, mwana wa Gelishomu, mwana wa Musa, heye na wanage nawali watambika kwa nhanzi ya Dani mbaka kuli zuwa alyo nhanzi ayo vyoiholigwe kuli upogozi wa ngondo.
31 Lelo nawalimiza alyo limalukolo lya kuhongola ligongomanyigwe na Mika na kulifugamila, mhela weng'ha yila ng'handa ya Nguluwi loiwele ako Shilo.