17
Mika na Mlawi
1 Mhela awo nakwali na munhu yumwe wa isi ya vidunda vya Efulaimu, nayali yochemigwa Mika.
2 Zuwa limwe nakamlonjela mayake, “Vila vihande elufu imwe na miya imwe vya sendi vyouhizilwe, nanyhulika kota nakumpanjila yakuhizile, heni ndanavyo. Heni ndo ndiviholile.” Mayake nakalonga, “Mwana wa heni utambichizwe na Mkulu Nguluwi.”
3 Lelo nakamhilusila sendi azo migwala elufu imwe na miya imwe. Mayake nakalonga, “Heni ndanguwika sendi azi ziwe kwa mijito jelile kwa Mkulu Nguluwi, zilawe mmoko mwa heni kwa chiwalo cha mwana wa heni, leka kugongomanya limalukolo lya kuhongola na limalukolo lya kuponda. Lelo ndangukuhilusila hegwe.”
4 Lelo loyamhilusile mayake sendi azo, mayake nakahola sendi migwala miya mbili, nakamha munhu yalinguponda sendi, naye nakadita limalukolo lya kuhongola na limalukolo lya kuponda. Jimalukolo ajo najiwichigwa mgati mwa ng'handa ya Mika.
5 Lelo Mika nayali na ng'handa ya milungu, naye nakagongomanya chizibao na jimalukolo jinji na kumhagula yumwe wa wanage yawe mtambika wa heye.
6 Mazuwa ago nakwali haduhu mndewa ako Isilaeli, chila munhu nayali yodita chinhu choneche choyalinguchona kota ndo chinoga kwa heye yuye.
7 Nakwali na msongolo yumwe Mlawi yalawile Betelehemu kuli isi ya Yuda, naye nakekala ako kuli nhanzi ya Yuda kota mjenzi.
8 Munhu ayo nakalawa Betelehemu kuli isi ya Yuda leka yalute kupala honhu ha kikala. Kuli majendo ga heye nakafichila kuli isi ya vidunda vya Efulaimu, mbaka kuli ng'handa ya ayo Mika.
9 Mika nakamuuza, “Nakulawa kohi?” Yula munhu nakamwidichila, “Heni nda Mlawi wa Betelehemu kuli isi ya Yuda, nani ndoluta kikala honhu honeche hala hondikona hanojile.”
10 Mika nakamlonjela, “Wikale hamwe na heni, uwe undonjela choni Nguluwi choyogana ndite na kahi uwe mtambika wa heni, nani ndokupa sendi migwala kumi chila mwaka na nguwo za kuvala na chilyo.” Yula munhu Mlawi nakenjila mgati.
11 Mlawi ayo nakakunda kikala na munhu ayo, nayali kota yumwe wa wana wa Mika.
12 Lelo Mika nakamhagula ayo Mlawi yawe yokola mijito jelile leka yawe mtambika wa heye. Nakekala haluga ha Mika.
13 Aho ndo Mika nakalonga, “Sambi ndivizela kota Mkulu Nguluwi konditila ganojile kwa vila ndina Mlawi kota mtambika wa heni.”