1 Mhela awo lokuwele haduhu mndewa hali isi ya Isilaeli, nakwali na Mlawi yumwe yawele yochikala kota mjenzi kumwando mwa isi ya vidunda vya Efulaimu, yaholile mhawake ako Betelehemu kuli Yuda. 2 Hamba, ayo mhawake nakamzudila ayo Mlawi, nakamleka na kuhiluka kwa mhaza wa heye ako Betelehemu kuli Yuda, nakekala ako kwa mhela wa myezi jine. 3 Hamba, mlume wa heye nakamuwinza leka yadawale na heye kwa igano na kumhilula kahi. Ayo Mlawi nayali na chitumagwa na midogowi mili. Lelo ayo mdala nakambochela ayo Mlawi na kumhilika kuli ng'handa ya mhaza wa heye. Mhaza wa ayo mdala loyamuwene Mlawi, nakasangalala kumona. 4 Hamba mkweye, mhaza wa ayo mdala, nakambochela goya. Nawo nawalya na kunwa ako kwa mhela wa mazuwa gadatu. 5 Hamba kuli zuwa lya kane, nawalilimka lufuku, nawewika goya leka woche, ila mhaza wa ayo mdala nakamlonjela yula Mlawi, “Ulye chinhu hado, hamba mokuka.” 6 Lelo nawakalisa, nawalya na kunwa hamwe weng'ha weli. Hamba, mhaza wa yula mdala nakamlonjela yula Mlawi, “Dedede, uwase hano nechilo ayi na kusangalala.” 7 Yula munhu nakaluka kuka, mkweye nakamdedeza ng'hatu, naye nakawasa kahi bahala. 8 Lelo kuli zuwa lya kahano, nakenuka kahi lufuku leka yoche, yula mhaza wa mdala nakamlonjela. “Dedede, mulye nakikala hano mbaka nemisi.” Nawo nawalya hamwe weng'ha weli. 9 Hamba, yula munhu nakenuka leka yoche heye na ayo mhawake na chitumagwa wa heye, yula mkweye, mhaza wa yula mdala, nakamlonjela, “Lole, matinazo ya habehi, uwase hano na kusangalala, mitondo kolilimka lufuku na kwaluka majendo kuhiluka haluga.”

10 Ila yula munhu nahakundile kuwasa hala kahi, nakenuka na kuka. Nakafika mbaka behi na muji wa Yebusi, uwele ndo muji wa Yelusalemu. Heye nayali na jila midogowi mili jiwichigwe goya na ayo mhawake. 11 Lelo lowafichile behi na Yebusi, nayali matinazo. Yula chitumagwa nakamlonjela yula mkulu wa heye, “Lelo inoga kwinjila kuli muji awu wa Wayebusi na kuwasa amo nechilo ayi.” 12 Mkulu wa heye nakamlonjela, “Hambe tuhinduche na kwinjila kuli muji wa wajenzi wohawawele Waisilaeli. Tolutilila na majendo mbaka Gibeya.” 13 Hamba nakamlonjela chitumagwa wa heye, “Lelo tuche na kujihejelela miji ajo na kuwasa kuli muji wa Gibeya ama Lama.” 14 Nawalutilila na majendo ga hewo mbaka mhela wa kuzinga kwa isanya, nawali habehi na muji wa Gibeya uwele ndo muji wa Benjamini. 15 Nawenjila kuli muji wa Gibeya na kikalisa kuli honhu hagati ha muji, ila nakwali haduhu munhu yawabochele haluga hake kuwasa.

16 Lole lowawele ako, matinazo nakalawila mlume yumwe yalalile kulawa kumgunda kwa heye. Munhu ayo nayali mwenyeng'haye wa isi ya vidunda vya Efulaimu, nayali yochikala ako Gibeya kota mjenzi, ila wenyeng'haye wa muji awo nawali nhanzi ya Benjamini. 17 Munhu ayo loyalolile, nakamona Mlawi yawele mmajendo, yawele kuli honhu ha hagati ha muji, nakamuuza, “Kwangulawa kohi na kwanguluta kohi?” 18 Naye nakamwidichila, “Twangukola hano kulawa Betelehemu kuli Yuda, twanguluta ako nzingo ya kutali ya isi ya vidunda vya Efulaimu, ako ndo kondilingikala. Ndanguhiluka kuli ng'handa ya Mkulu Nguluwi, ila haduhu munhu yambochele haluga ha heye. 19 Ila twanazo ng'hocha kwa chiwalo cha migongolo ja hetwe na mibumunda na divai kwa heni na ayu mpogozi mdala na kwa ayu msongolo yawele hamwe na hetwe. Haduhu ne chinhu choneche chipunguche.” 20 Hamba, yula munhu yalalile nakalonga, “Kikala goya kuwe kwa hegwe. Ndowapani chila chinhu chomgana, ila mleche kuwasa hano hagati ha muji.” 21 Ahyo, nakawabochela na kuluta nawo mbaka haluga ha heye, nakajipa midogowi chilyo, nawo nawahovuga magulu ga hewo, nawalya na kunwa.

22 Nalowawele wosangalala mnhumbula, wanhu wehile wa muji awo nawaizunguluta ng'handa yeng'ha kuli banzi zeng'ha. Nawatowa lwizi kuno wolonga na ayo yawele na ng'handa na kumlonjela, “Mgale kunze yula munhu yafichile haluga ha hegwe leka tuwase na heye.” 23 Ayo yawele na ng'handa nakalawa na kuwalonjela, “Wang'holozangu ndanguwadedeza, mleche kudita wihe wa kota hino kwa vila munhu ayu nakenjila kuli ng'handa ya heni. Mleche kudita mbuli ya kubasa soni. 24 Lole, mhinza wa heni ayu aha, yang'hali ting'hana na mlume na mhawake munhu ayu ndowegala hano kunze na hemwe mowaditila kota vyomlingugana. Ila mleche kumditila munhu ayu mbuli ya kubasa soni kota hino.” 25 Ila wala wanhu hambe wamhulichize. Lelo yula Mlawi nakamlavya yula mhawake na kuwegalila wala wanhu. Hewo nawamhola na kumditila vibi nechilo yeng'ha mbaka habehi na kubwemwenzuka, nawamleka yalute. 26 Aho ndo yula mdala nakahiluka lufuku, nakagwa hali lwizi lwa ng'handa iwele mkulu wa heye nayali yochikala. Nayali baho mbaka lokubwemwenzuche.

27 Yula mkulu nakalilimka na kuchumula lwizi leka yoche, nakalawa. Ayo mhawake nayali yagwile kuli lwizi lwa ng'handa na moko ga heye nagali hali chizingiti. 28 Nakamlonjela, “Winuche lelo tuche.” Ila heye hedichile chinhu. Nakamwinula na kumuwika mchanya mwa idogowi na kuluta haluga ha heye. 29 Loyafichile haluga ha heye, nakahola chimaje na kumibata yula mhawake, nakamdumula chitomo chimwe mbaka chiyage, vitomo kumi na vili nakavihilika kuli mbaka jeng'ha ja isi ya Isilaeli. 30 Lelo weng'ha lowaiwene mbuli yila, nawalonga, “Mbuli kota ino hainakoleka ne koneka kulawa zuwa lila Waisilaeli lowakwinile kulawa kuli isi ya Misili mbaka lehano. Mijese na kulongasa na kwamula.”