97
97-ci Ǐvel mə̌ğ
1 Q'ončuxe me dünyəni loxol kalaluğbalo!
Barta amdarxoy bito mǔqbakeq'an,
Barta dünyəni lap ošel bakalt'oğonal içoğoy mǔqluğa ak'est'eq'an!
2 Boç̌u asoyen içu c'ap'bi běğ k'inək'e Buxačux,
İçu zülmət bayinq'luğen bəc'ürpi sa gür işiğ k'inək'e.
Düzgünluğen q'a düzgün divanbsunene ə̌leśe Şot'ay taxt'.
3 Bəc'ük'eśi bok'ala arux k'inək'e Şo,
Bok'osp'i śinek'on Şot'in İz běš c'eğala düşmənə.
4 Dirist' dünyənəne duğsa Şot'ay yaq'abala s'ə̌q'en,
Oç̌ala q'a iz loxol bakalt'oğoy pulane haq'sa t'e s'ə̌q'e sakala işiğen.
5 Buruxmuxe mom k'inək' xebaksa Q'ončuğoy běš,
Dirist' dünyəni kalo bakala Q'ončuğoy běš!
6 Göyurxone Şot'ay düzgünluğa bayanbsa,
Bito azuk'xone Şot'ay kalaluğa aksa.
7 Ot'p'anan, ay binik' buxačuxxobul k'os'bi şot'oğoxun fərəxləyinşakalxo!
Q'ončuğobul k'os'banan, ay buxačuxxoy bito!
8 Vi düzgün divanbi düzgün q'ərar c'evksuna ibaki Sione mǔqbaki,
İudeyina bakala şəhərmoğoy ük'e qayeśi, ay Q'ončux.
9 Şot'o görə ki, Hun dirist' dünyəni loxol padçağluğbalo, Ala Arśiyonu,
Bito buxačuxxoxun üst'ün bakalonu, ay Q'ončux.
10 Şərəxun ə̌xil bakanan, ay Q'ončuğoy yaq'en tağalorox,
İzi əyitəxun nu c'eğalt'oğoy elmoğone q'orişon Şot'in,
Zalımxoy kiyexune çark'est'on.
11 İşiğat'un c'eğon düzgünorox,
Mǔqluğe eğon ük' təmizt'oğoynak'.
12 Ef mǔqluğa Q'ončuğost'a ak'anan, ay düzgünorox,
Şot'ay ı̌velluğa ef muzel eçeri şükürbanan!