98
98-ci Ǐvel mə̌ğ
Sa Ǐvel mə̌ğ
Təzə sa mə̌ğ mə̌ğpanan Q'ončuğoynak',
Nu ak'eśi əşur biq'iyone Şo!
İz kiyexun hər şeye ayesa,
Şuk'k'alast'a nu bakala zorene çökt'est'a Şot'in bitova. *
İçu nu çalxalt'oğone İzi turin oq'a laxi Q'ončuğon,
İzi düzgünluğane ak'est'i azuk'xo!
Kamtenebi Şot'in israilluğoxun İzi nu badalbakala çuresuna,
İz tadi əyiti loxol çurepi.
Dünyəni bip' t'ǒğenal anek'i beşi Buxačuğon yaynak' eçala çark'esuna.
 
Mǔq səsur c'evk'anan Q'ončuğoynak', ay dünyəne bakalorox bito,
Farpi əçipanan, bartanan ef ük'q'an qayeśi!
Arfa farpi Q'ončuğo tərifləyinşanan,
Arfin faren mə̌ğpi tərifləyinşanan Şot'o!
Şeyp'ur q'a zurna farpanan Q'ončuğoynak',
Mǔq səsur c'evk'anan yaynak' Padçağ bakalt'aynak'!
 
Mǔq səsur c'evk'anan, ay dəniz q'a iz boş bakalorox bito!
Barta dünyənenal muz qaypi bito amdarxoxun sagala mə̌ğq'anpi.
Barta oqurxonq'an iz ganuxun hayzeri çəpibi,
Buruxmuğonq'an əçipi mǔqexun!
Şot'o görə ki, mone, enesa Q'ončux me dünyənə düzgün divanbseynak',
Bito azuk'xoy loxol sa piin běği
Şot'oğoynak' düzgün q'ərar c'evkseynak'e eysa.
Ak'est'a vi mǔqluğa, ay dünyə!
* 98:1 Ǐvel mə̌ğ. 33:3; Qay. əyit 6:9-10;