96
96-ci Ǐvel mə̌ğ
(1 Hadis. 16:23-33)
1 Q'ončuğoynak' təzə sa mə̌ğ mə̌ğpanan,
Ay dünyəne bakalorox bito, Q'ončuğoynak' mə̌ğpanan.
2 Q'ončuğoy s'iya alabala mə̌ğur mə̌ğpanan!
Ef muzel eçanan hər ği Şot'ay Çark'est'al baksuna!
3 Şot'ay kalaluğa bayanbanan azuk'xoy arane,
Şot'ay biq'i nu ak'eśi əşurxoxun exlətp'i p'ap'esp'anan mot'o amdarxoynak'.
4 Şot'aynak' ki, Q'ončux kalane,
Şot'o heq'ədər tərifbaynan hələ male,
Sal sa buxačuğoy nu laft'es bakala hörmətəne lafst'a Şo.
5 Kiyel düześi binik'xone q'erəz azuk'xoy buxačuxxo,
Əfçi buxačuxxone şorox.
Q'ončux isə göyurxo yaratmişiyone!
6 Hörməti, s'iye q'ončuxe Şo,
İçust'a bakala zora q'a tamtarağane ak'est'a Şot'ay məsk'ən saki xramen.
7 Q'ončuğoy s'iya alabanan, ay me dünyəne bakala bito azuk'xo,
Şot'ay zora, Şot'ay kala s'iya ef muzel eçeri İz s'iya alabanan!
8 Şot'ay kalaluğa İz s'iya görə ç̌oyel c'evk'anan,
Q'ončuğoyxrame məəlne payurxo ext'i bakinan.
9 Şot'in İz işiğ sakala ı̌velluğa haq'i c'eğat'an İz běš bul k'os'banan,
Barta me dünyəne bakalt'oğon Şot'ay şu baksuna ak'i q'ı̌beq'at'un.
10 Barta bito azuk'xon ibakeq'an:
"Q'ončuxe kalo,
Şone me dünyənə laxi ost'aarbiyo,
Bitot'ay loxol sa piin běğala Divanbale Şo".
11 Mǔqbakanan, ay göyurxo,
Ç̌oyenq'an axšumpi vi, ay oç̌al!
Mə̌ğpa mǔqexun, ay dəniz,
Barta xene oq'a bakala heyvanxonal içoğoy səsə c'evk'eq'at'un!
12 Barta çölmoğoyal, çöle k'ə bunesa şot'oğoyal ük'q'an qayeśi.
Barta c'ələye bakala xodurxonal içoğoy heq'ədər mǔq baksunaq'at'un
13 Q'ončuğoynak' mə̌ğpi ak'est'i.
Şot'o görə ki, enesa me dünyəne Şo,
Sa padçağ k'inək', bitot'ay kalo bakseynak'e eysa.
Dünyənə İz düzgünluğa,
Azuk'xoval İzi tadi əyiti loxol çurk'ala Buxačux baksuna ak'est'ale Şot'in!