94
94-ci Ǐvel mə̌ğ
1 Ay Q'ončux, ay həyif haq'ala Buxačux,
Vi əcuğoy k'ə baksuna ak'est'a, ay həyif haq'ala Buxačux!
2 Hayza, ay me dünyəni Divanbal,
Va hik'k'al bi içoğo bitot'uxun üst'ün laxit'oğoy paya tada!
3 Ay Q'ončux, hevaxt'al śirik',
Axıri hevaxt'al śirik' pist'oğoy uk'alo bakale?
4 İçoğoy əyiti bul lovğalayinşaksune,
Şər əşur biq'i hələ mot'o piyelal bat'unst'a şot'oğon.
5 Ç̌axç̌uxp'i c'ovat'unksa Vi azuk'a,
Hik'k'ali galat'un laxsa Vi c'ək'p'iyorox bakalt'oğo.
6 Süpür çupuxxo q'a beş ölkinə bakala q'əribxot'un bespsa,
Yetimxoy elmoğot'un haq'sa.
7 İçoğoy ük'e boş "ateneksa Q'ončuğon,
Fikir tene tast'a israilluğoy Buxačuğon" next'un.
8 Ef haq'ıla ef bel topbanan, ay axmağxo!
Ef pulmux hevaxt' qayeğale, ay q'ammazxo?
9 Hetəre bakon ki, və̌x ibakseynak' ǔmǔx tadit'in İçin nu ibakane?
Nəəl və̌x pul tadit'ay piyexun k'ənesa aç̌ane?
10 Azuk'xoy cazina tadalt'in ef biq'i əşurxo nu aksuna lanexon ki?
Amdarxo zombi düz yaq'a laxalt'in efi mani yaq'en taysuna tene ak'on ki?
11 Axıri avane Şot'in amdarxoy beyne bakala fikirxo bitova,
Mot'oğoy bito ams'i, puç sa şey baksuna.
12 Bəxt'əvəre, ay Q'ončux, içu düz yaq'en taysuna Hun zombala amdar,
Vi k'anunxo Hun içu ak'est'ala amdar!
13 Metərt'ay ük'əl arxayine bakon iz t'ar ğine,
Pist'oğo Vi caza hələ nu hari p'ap'i t'e vədine!
14 Boteneson Q'ončuğon İz azuk'a,
İz c'ək'p'iyorox bakalt'oğo tək bartenek'on.
15 Bitot'ay loxol sa piin běğeğala vədə eğale p'urum,
Düzgün q'ərar tadeğale bitot'aynak',
Düz yaq'en tağalt'oğonal əməlbalt'un mot'oğoy bitova.
16 Şuva pist'oğoy běš c'eri bez tərəf çurpes bakoy?
Me şər bakalt'oğoy loxol taśi şuva zaynak' bač'an bakes bakoy?
17 Əgər Q'ončuğon bez kiyexun nu biq'iyniy,
İsə zu t'e dünyənezuy.
18 Bez tur lamandat'an za kul boxodiyo,
Za Vi nu badalbakala çuresuna ak'est'iyonu Hun, ay Q'ončux,
19 Dərdurxon za haq'layinşiyal bakayin,
Za ük' tadi mǔqt'alonu Hun.
20 Bitot'ay loxol sa piin nu běği
Düzgün nu divanbala kalaluğbalxoy tərəf ten çurk'on Hun.
21 Běğa hetərt'un düzgünt'ay loxol taysa,
Taxsırsuzt'aynak' q'ərar c'evk'i
Şot'ay elmoğo haq'sun çuresa!
22 Ama zaynak' sa q'alane baki Q'ončux,
Bez bač'anene çurpi bez Buxačux!
23 İçoğoy ǒyne barale şot'oğoy bi bito pisluğxo!
Əfçibale şot'oğo beşi Buxačuğon içoğoy biq'i şər əşurxo görə,
Əfçibale şot'oğo Q'ončuğon!