89
89-ci Ǐvel mə̌ğ
Ezraxlu Et'ani ögüd-nəsyət tadala Ǐvel mə̌ğ.
1 Zu həmişə Q'ončuğoy nu badalbakala çuresunaxun mə̌ğk'oz,
Yax tadi əyiti loxol çurpsuna oşin eğala nəsilxoval avabakest'oz.
2 Metərez mə̌ğě zu: "Vi yax çuresun həmişəluğe, nu badalbakala çuresune şo,
Göynul laxeśi Vi taxt'a hik'k'alen iz ganuxun nu galdes bakala k'inək'
Vi beşi bač'ane çurpsunal hik'k'alen badalbes tene bakon".
3 Vi ǰomoxun c'eri əyitmuxe morox:
«Bez c'ək'p'it'uxunez irəziluğ ğaç̌eśi Zu,
Bez k'ul Davidaz elasp'i əyit tadi:
4 "Vi taxt' sal sa vədə ams'i tene mandal,
Padçağxoy nəsil bakale vi nəsil"».
5 Ay Q'ončux, göynul bakalt'oğonal Vi biq'i nu ak'eśi əşurxot'un mə̌ğpi tərifləyinşbsa,
Vi beşi bač'ane çurpsunat'un bayanbsa ı̌vel bakalt'oğoy gireśi mərəkəye.
6 Bune ki göynul Q'ončuğo p'ap'alo?
Şuva t'iya bakalt'oğoxun Şo k'inək' bakalo?
7 Q'ı̌yene haq'sa angelxo Şot'ay běš,
İz hərrəmine bakalt'oğoy bitot'ay pula haq'alone Buxačux.
8 Ay Göye Q'oşuni Buxačux bakala Q'ončux, Va p'ap'alo butene!
Tadi əyiti loxol çurpsune Vi p'ə̌mci s'i,
Ay İz kiyexun hər şey ayeğala Q'ončux!
9 Dənizxoy loxol kalaluğbalonu Hun,
Tufanen ěqevk'i ləpoğo bask'est'alonu.
10 Bitot'ay pula haq'i Raxavan duği besp'i Hun,
Düşmənxon şəp'eśi Vi zorba kiin.
11 Göyurxoval, oç̌alinal binorina Hunen laxe,
Me dünyə içal, iz boş bakaloroxal bito Vi kiyexun c'eri əşe.
12 Q'uzeyal Hunen yaratmişe, güneyal,
Tavor q'a Xermon buruxmoğonal Vi s'iyane duğsa.
13 Zorbane, başarağlune Vi kul,
Vi kiyele hər şey!
14 Düzgünluğen q'a düzgün divanbsunene ə̌leśe Vi taxt',
Vast'a bakala çuresunen q'a şuk'k'ala qı̌ yaq'a nu efsunenyan çalxsa Va!
15 Vi s'iya alabala mə̌ğur mə̌ğpsun q'ısmat baki azuk' he bəxt'əvəre, ay Q'ončux,
Vi ük'e bask'iyoroxe şorox.
16 Vi s'iya duğsunen içoğoy ği mǔq c'ovakalorox,
Vi düzgünluğa ak'i ěqeğaloroxe şorox!
17 Axıri şot'oğo zorba baloval, s'iye q'ončux baloval Hunnu,
Hunnu şot'oğo Vi kiin ěqevk'i ən hörmətlu gala laxalo.
18 Q'ončuxe yaynak' bač'an bakalt'u c'ək'k'alo,
İsrailluğoynak' Ǐvel Bakalone yaynak' t'e padçağa laxalo!
19 Mone, metəren pey Hun Vi yaq'en tağalt'oğo,
Şot'oğo alaxun ak'eśi me əyitmoğon p'ap'esp'ey:
«Zorbazbi Zu sa q'oççağa,
Şot'o azuk'i boşt'an c'ək'p'i taxt'az arśevk'i.
20 Bez k'ul Davidaz eçeri arśevk'i, lafest'a şot'o me ganu arst'un,
Bez ı̌vel c'əyinəxun şot'ay bel lə̌ə̌mdi c'ək'eśiyoz bi şot'o.
21 Şot'ay loxol bakale Bez kul həmişə,
Zaxun iz zora haq'ale şot'in.
22 Nə düşmənen şot'o sakes tene bakal,
Nəəl sa pist'in şot'o koruğ tades.
23 İz düşmənxo turin oq'a laxoz şot'ay piin běš Zu,
Şot'o nifrətbalt'oğoy belxun duğoz.
24 Şot'ay bač'ane çurk'oz Zu,
Bez nu badalbakala çuresuna şot'oxun kamtezbal,
Şoval Bezi içuxun baksuna görə ğibaği zorba bakale!
25 Şot'ay kul hər gala p'ap'ale,
Dənizxoxun burqi ə̌xil oqurxol śirik' bito iz kiin oq'a bakale.
26 Şot'in Za "bez Bava, bez Buxačux,
Za çark'est'es bakala Q'aya" pi k'alk'ale.
27 Zuval şot'ay loxol k'oji kala ğar loxol běğala piin běğoz,
Şot'o me dünyəni bito padçağxoxun üst'ün booz.
28 Bezi nu badalbakala çuresuna şot'o həmişə ak'est'oz,
Hik'k'alen śarpes tene bakal Bezi şot'oxun ğaç̌eśi irəziluğa.
29 Şot'ay s'i sal sa vədə tene aç̌al,
Göyurxollarik' həmişəluğ bakale şot'ay padçağluğ,
Şot'ay nəsiləxun bakalorox arśale həmişə Bezi şot'o tadi t'e taxt'a!
30 Əgər şot'oxun bakit'oğon Bezi k'anuna t'ǒǒxbayt'un,
Bezi laxi q'aydoğo nu əməlbayt'un,
31 Bezi bürüşit'oğo hik'k'albi,
Bezi tadi əmirxo ç̌axç̌uxk'ayt'un,
32 Şot'oğo Bezi əyitəxun c'eysuni k'ə baksuna ak'est'oz!
Zapest'oz şot'oğo içoğoy əşp'est'i günaxi cazina!
33 Ama p'urumal Bezi nu badalbakala çuresuna kamtezbal şot'oxun Zu,
Bezi tadi əyiti loxol çurk'oz.
34 Bezi şot'oxun ğaç̌eśi irəziluğa tez śark'al Zu,
Bezi pi əyitmoğoy saycət'u qoş tez ext'al.
35 Əfçi nu c'eğala sa əyitez tade Davida Zu,
Bez ı̌velluğaz muzel eçeri elasp'e ki,
36 Padçağxoy nəsil bakale şot'ay nəsil,
Běğe ga ams'i nu mandala k'inək'
Şot'ay taxt'al sal sa vədə ams'i tene mandal!
37 Şot'ay padçağluği həmişəluğ baksunaz pe,
Göynul bakala xaşa şahid biq'iz əyit tade mot'o Zu!».
38 Ama mone, Vi c'ək'p'it'uxun ç̌on taradi Hun,
Nifrətenbi şot'o, əcuğone biq'i şot'ay loxol Vi.
39 Şot'oxun ğaç̌eśi irəziluğa śarenpi,
Lik't'i sanki şot'o iz taxt'e loxolxun.
40 Yerusalimi q'aloğon śarpi Hun,
İz bariğon oç̌alen sabi.
41 İsəəl yaq' c'ovakalt'in şot'o fǔq'ene,
Axšumi gane baki hərrəmine bakala azuk'xoynak'.
42 Kulen biq'i şot'ay düşmənxo Hun,
Şot'o nifrətbalt'oğo mǔqendi.
43 Hun q'ılıncan şot'ay kiyexun duği saki,
Davina c'eğat'an iz bač'ane ten çurpi.
44 Şot'ay tamtarağaxun hik'k'al tene mandi,
Taxt'axunen saki şot'o Hun!
45 Cəyilcə q'ojanbi şot'o,
Xəcələtenen bəc'ürpi şot'o paltaren bəc'ürk'ala k'inək'.
46 Ay Q'ončux, hələ heq'ədər Va yaxun ə̌xil biq'alnu Hun?
Hələ heq'ədər Vi əcuğ bəc'ük'eśi bok'ale metər?
47 Za eyexun ma c'evk'a! Heq'ədər mandalyan ki me dünyəne güvə?
Axırda p'uri tayseynak'en yaratmişe yax Hun.
48 Şuva ki me dünyəni t'ǒğə biq'i çurpiyo?
Şuva iz elmoğo t'e dünyəne taysunaxun çark'est'iyo?
49 Horebay Vi nu badalbakala çuresun, ay Q'ončux?
Axıri Davidaxun ç̌o nu tarast'una elasp'i əyiten tadey Hun!
50 Běğa Vi k'ula hetəre lafst'a buxačuxsuzt'oğoy Va lağa haq'sun,
Şot'oğoy Va axšumi gala laxsun, ay Q'ončux!
51 Běğa hetərt'un Vi düşmənxon içoğoy ǰomo eğalt'u əyite,
Běğa hetərt'un Vi c'ək'p'it'ay hər biq'ala əşlə axšumi gala laxsa, ay Q'ončux!
52 Alxışq'an baki Q'ončuğo həmişə!
Ammen, ammen!