Girke bip'imci hissə: 90-106-ci Ǐvel mə̌ğurxo.
90
90-ci Ǐvel mə̌ğ
Buxačuğoy amdar Moiseyi afırı
1 Ay Q'ončux, bito nəsilxoy umudi ga Hunnu.
2 Hun hələ burqesunaxunal běš bakiyonu, ay Buxačux,
Buruxmux əmələ harit'uxun běš,
Hun oç̌ala q'a dünyənə yaratmişit'uxun běš bakiyonu, həmişəəl bakalonu.
3 İnsana "k'ulaxunen haq'eśe k'ulal gərbakalnu" pi
Şot'o oç̌ali tozen bsa Hun!
4 Sa hazar usen hik'k'al tene Vi piyes,
Nəyninəxun ğeyinal śirik' c'ovaki sa vaxt' k'inək'e,
Üşenin sa hema saad k'inək'e.
5 Xenen taşalt'ullarik' tanşt'a Hun amdarxo,
Sa nep' k'inək't'un hari c'ovaksa şorox.
Běğ çərtk'at'an iz bula alabi o k'inək't'un:
6 Savaxt'an göpgöyün ěqeśi kalabakala,
Biyəbakat'an isə q'aribaki tağala sa o k'inək'.
7 Mone, əfçinebsa yax Vi əcuğon,
Vi hirsen yax vəlvəlinəne bast'a.
8 Vi piin běše beşi taxsırxo bito,
Beşi c'ap'bala günaxxon ç̌oyel c'evksa Hun!
9 Beş ğinane mə̌yinbsa Vi əcuğon,
Pula q'ic'p'i qayk'amine c'ovaksa beşi zülümen buy ğimxo.
10 Beşi ömüren heq'ədəre zap'e ki güvə?
Yetmiş usen, elmuxlat'aynak' lap səksənq'an baki!
Şot'ayal ən şaat' vədə zülümi q'a dərde boşe c'ovaksa,
Ğimxo hari tanesa, yanal əfçiyanbaksa.
11 Vi hirsen k'ə bes baksuna beyne p'aq'est'ala şey tene!
Vi əcuğoy k'ə baksunene ak'est'a beşi Vaxun heq'ədər q'ı̌bsun lazım baksuna.
12 Zomba yax beşi hər ğine q'ədirə avabaksuna,
Barta mot'o q'amişaki müdrik baken yan.
13 Bəsp'a, ay Q'ončux! Yəni me əcuğ sal tene çaxeğal?
Me Vi k'ulurxo Vi goroxq'an hari!
14 Kammaba yaxun Vi nu badalbakala çuresuna ği burqeğat'an,
Barta beş ük'q'an qayeśi,
Barta mǔq c'ovakest'en beşi hər ğina.
15 Yax caza zapest'i hər ğine gala,
Koruğ ak'i hər useni gala mǔqt'a.
16 Barta Vi k'ulurxon Vi biq'ala əşurxo,
İçoğoy əyloğonal Vi kalaluğa ak'eq'at'un.
17 Ay beşi Buxačux bakala Q'ončux, beşi loxol běğa!
Beşi biq'ala əşlə Hun yönə bada,
Beşi kiyexun c'eğala əşlə Hun yönə bada!