88
88-ci Ǐvel mə̌ğ
Mə̌ğk'alxoy dəst'in kalat'aynak' śameśi Goraxi ğarmoğon mə̌ğk'ala Ǐvel mə̌ğ.
Ezraxlu Hemani "Maxalat' leannot" uk'ala faren mə̌ğěğala ögüd-nəsyət tadala Ǐvel mə̌ğ.
1 Ay Q'ončux, ay za çark'est'ala Buxačux,
Üşe-ğena Va xoyinšezbsa!
2 Bez afırına ibaka,
Bez xoyinša nu ibaksuna ma laxa.
3 Bəloğon za q'ə̌q'ə̌nne,
Mone, bez sa tur ene gərəmzoğone.
4 P'uri taśi sa amdar k'inək',
Mafarsuz sa bədən k'inək'zu zu.
5 Oç̌alaxp'aki p'urinaxun sa fərg tezax bu bezi,
Vi eyexun c'eri,
Vi kula iz loxolxun zapi,
Oç̌alin oq'a bask'i sa meyid k'inək'zu zu.
6 Za ən bə̌ğə̌loy gərəmzinə,
T'e zülmət bayinq'luğan badi Hun.
7 Vi əcuğ bez bel t'etəre bari ki,
Ěqeśi dənizi ləpoğon but'k'ala k'inək'e but'k'i şot'in za.
8 Bez dost'urxon zaxun ə̌xilbi Hun,
Şot'oğo zaxun irit'p'esendi.
İsə mone, t'ussağ k'inək'zu, c'eyes tez baksa.
9 Bez piin işiğe aç̌i zülümi kiyexun.
Hər ği Vaz k'ale zu, ay Q'ončux,
Bez bula alabi Vaz xoyinšpsa.
10 P'urit'oğo ak'est'alnu Vi möcüzoğo?
Yəni şot'oğoy urufxon hayzeri Va şükürbalt'un?
11 Gərəmzoğo bayanbakale Vi nu badalbakala çuresun?
Yəni bədəni əfçibaki tağala t'e gala car sakalt'un
Vi beşi bač'ane çurpsuna?
12 Vi biq'i nu ak'eśi əşur t'e k'ule oq'a,
Yəni Vi düzgünluğ p'uri taśit'oğoy t'e məsk'əne çalxeğale?
13 Ama mone, Va köməyəz k'ale, ay Q'ončux,
Hər savaxt'an afırınenez eysa Vi běš zu.
14 Het'aynak'en za tǒǒxbsa, ay Q'ončux?
Het'aynak'en zaxun ç̌o tarast'a?
15 Əyelluğaxun zülümi boşzu, ene bisazu,
Çarasuzez mande zu Vi tadi bəloğoy kiyexun.
16 Vi hirsen za ěqeśi ləpinen amdara bəc'ürpi taşala k'inək'e bəc'ürpi,
Əfçizbaki Vi zaynak' yaq'abi bəloğoxun zu.
17 Xe hari xirt't'əyə p'ap'i k'inək'zu həysə zu,
Ç̌axene za şot'in, dirist' q'uc'p'i taneşt'a.
18 Bez ı̌šat'oğo, bez dost'urxon zaxun ə̌xilbi Hun,
Bayinq'unaxun başq'a şuk'k'al tezax bu bezi!