86
86-ci Ǐvel mə̌ğ
Davidi afırı
1 Ay Q'ončux, me fağıra ibaka,
Eht'iyəci boş bakalt'u coğabsuz ma efa!
2 Q'orişa Vi laxi k'anunxoxun nu c'eri Vi yaq'en tağalt'u,
Vane bač'an tarade me Vi k'ulen .
Çark'est'a za, axıri Hunnu bez Buxačux!
3 Bez loxol běğa, ay Q'ončux,
Dirist' ği Va k'alpi xoyinšezbsa zu!
4 Mǔqt'a me Vi k'ula, ay Q'ončux,
İz ük'ə Va c'evk'i tadalone şo.
5 Xeyirxax bakalonu Hun, ay Q'ončux,
Bağışlayinşes bakalonu!
Va qə̌věğalt'oğo Vi nu badalbakala çuresuna,
Vast'a bol bakala t'e çuresuna ak'est'alonu Hun!
6 Bez afırına ibaka, ay Q'ončux,
Bez xoyinša nu ibaksuna ma laxa.
7 Vaz k'ale bez t'ar ğine zu,
Avazu za coğabsuz ten efal.
8 Ay Q'ončux, Vallarik' buxačux butene!
Mani buxačuğone Vi biq'i əşurxo biq'es bakon?
9 Mone, bito me Vi yaratmişi azuk'xo Vi běš eğalt'un,
Hari Va bul k'os'balt'un,
Vi s'iya alabalt'un şot'oğon, ay Q'ončux!
10 Şot'o görə ki, Hun kalanu,
Nu ak'eśi əşur biq'alonu!
Tək Buxačux Hunnu!
11 Ay Q'ončux, za Vi əyitəxun nu c'eysuna zomba,
Barta Vi laxi yaq'en taśi za sal sa vədə qı̌ yaq'a nu barst'una ak'est'az!
Va çalxsunen, Va ük'in bul k'os'bsunen c'ovakest'ala sa yəşəyinş q'ısmat ba za.
12 Zuval Va ük'in çureśi tərifləyinşoz, ay bez Buxačux bakala Q'ončux,
Vi s'iya həmişə alaboz!
13 Şot'o görə ki, Vi za ak'est'i nu badalbakala çuresun t'emane ki,
Za bisunaxunen çark'est'i, t'e dünyənexunen zapi c'evk'i Hun!
14 Ay Buxačux, bez loxolt'un eysa me içoğoxun irəziyorox,
Bez elmoğo haq'sunt'un çuresa me zalımxon,
Vaxun tet'un q'ı̌bsa şot'oğon!
15 Ama Hun, ay Q'ončux, ük' bok'osp'al, şaat'luğ ak'est'ala Buxačuxnu,
Hun gele səbirlu, çuresunen buy q'a İz tadi əyiti loxol çurk'ala Buxačuxnu.
16 Bez loxol běğa, Vi ük' bok'ospsuni k'ə baksuna ak'est'a,
Vi zorba baki bez bač'ane çurpsuna ak'est'a,
Çark'est'a Va bul k'os'bala çuux-nökəri Va ı̌ša bakala me ğara.
17 Avabakest'a za bezi Vi ük'el basksuna,
Barta mot'o za nifrətbalt'oğonal ak'eq'at'un,
Barta Vi za kul boxost'una, za ük' tast'una ak'i ot'p'eq'at'un, ay Q'ončux!