85
85-ci Ǐvel mə̌ğ
Fark'alxoy dəst'in kalat'aynak'. Goraxi ğarmoğoy Ǐvel mə̌ğ.
1 Ay Q'ončux, Vi ük' bok'ospsuni k'ə baksuna ak'ene Vi azuk'en,
Vi kula boxodi mǔq ğinan c'evk'ey İak'ovi nəsilə Hun!
2 Vi azuk'i taxsırxo bağışlayinşenuy,
Şot'ay bito günaxxon os'k'i taşerey.
3 Bask'est'enuy Vi əcuğo Hun,
Ten barey şo bəc'ük'eśi Va haq'layinşane.
4 Ay yax çark'est'ala Buxačux, yax süft'in k'inək' bəxt'əvər ba,
Beş loxol biq'i hirsə Vaxun ə̌xilba.
5 Yəni Vi əcuğ həmişəluğe?
Yəni şo nəsiləxun-nəsilə c'ovakiyal tene çaxeğal?
6 Hevaxt' p'urum ği aksa burqalyan yan?
Vi beş t'ǒğǒl baksuna ak'i hevaxt' beş ük' qayeğale?
7 Ay Q'ončux, kammaba yaxun Vi nu badalbakala çuresuna,
Çark'est'a yax!
8 Mone, izbaksa zu Q'ončux Buxačuğoy uk'alt'oğo,
Male mande Şot'ay azuk'i ak'ala mə̌yin ğineynak',
C'eğale Şot'ay yaq'en tağalorox şaat' ğina.
Saycə axmağluğ bi p'urum içoğoy yaq'a nu aç̌esp'ayt'un!
9 Ǐšane, hari p'ap'ene Şot'o çalxalt'oğoynak' Şot'oxun eğala çark'esun,
T'ap'eğale Şot'ay s'i me oç̌ala!
10 Buxačuğoy nu badalbakala çuresun bakale amdarxo düzgün yaq'en taşalo,
T'e yaq'axun nu c'eysunenal şot'oğoynak' serluğ eçale.
11 Şot'oxun ğaç̌eśi irəziluğa əməlbsunen ěqevk'ale şot'oğo,
Běğale şot'oğoy loxol Buxačuğon alaxun, ak'est'ale şot'oğo İz düzgünluğa.
12 Mǔqt'ale yax Q'ončuğon İz xeyir-bərəkəten,
Oç̌alenal yax iz bara tadale.
13 Düzgünluğen Şot'oxun běš hari Şot'aynak' yaq' həzirbale.