84
84-ci Ǐvel mə̌ğ
Fark'alxoy dəst'in kalat'aynak'. Git't'iten mə̌ğěğala Goraxi ğarmoğoy Ǐvel mə̌ğ.
1 Ay Göye Q'oşuniQ'ončux,
Vi məsk'ən saki ganuxun boşala şey tene!
2 Q'ončuğoyxrame məəlne bayseynak' bez cicirxone ç̌aye,
Mǔqbaksune çuresa bez elmux, Vi s'iya alabala mə̌ğure mə̌ğpsun çuresa bez ük'en,
Yəşəyinşest'ala Buxačuğoy t'ǒğǒl baksunaxun başq'a hik'k'al çurtezsa zu.
3 Ay Göye Q'oşuniQ'ončux,
Ay bez padçağ bakala Buxačux,
Çovalxonal hari Vi q'urban eçala gane t'ǒğǒlt'un içoğoy mesa biq'sa,
Bač'aynoğonal içoğoy baloğo t'e ganu ı̌šat'un c'evksa!
4 Bəxt'əvərt'un Vi məsk'ən saki ganu yəşəyinşalorox,
Vi t'ǒğǒl baki həmişə Va tərifləyinşala mə̌ğur mə̌ğpes bakalorox!
5 He bəxt'əvərt'un zora Vaxun haq'alorox,
İçoğoy ük'exun Siona laśi t'iya bul k'os'bsun c'ovakalorox!
6 Xesuz mandi dərənexun c'ovakat'an
T'iyana ǰalpi c'eğala orayinxoy məsk'ən k'inək' ak'aloroxe şorox!
T'e oç̌ala xeyir-bərəkət eçala ağalinen pušp'i sa oç̌al k'inək't'un aksa şot'oğon!
7 T'iya laysunene zorba bsa şot'oğo,
Axıri taśi Siona Buxačuğo bul k'os'balt'un şot'oğon!
8 Ay Göye Q'oşuniQ'ončux, bezi afırına ibaka!
Ay İak'ovi Buxačux, za coğabsuz ma efa!
9 Yaynak' bač'an bakala padçağa nu aksuna ma laxa, ay Buxačux,
Barta Vi c'ək'p'iyo Vi piyes şaat'q'an ak'eśi.
10 Vi xrame məəlne c'ovakest'ala sa ği
Zaynak' Vi bakala ganuxun ə̌xil c'ovakest'ala hazar ğinaxun şaat'e!
Vi məsk'ən saki gane ç̌omoy tume çurpsun
Pist'oğoy gam çadıri boş arst'unaxun şaat'e!
11 Axıri Q'ončux Buxačux beş bač'ane,
Yaynak' běğ baki yaq' ak'est'alone!
Yax İz ük' bok'ospsuna ak'est'alo q'a hörməti q'ončux balone Şo,
Düzgün yaq'en tağalt'uxun İz şaat'luğa kamtenebon Şot'in!
12 Ay Göye Q'oşuniQ'ončux,
Va bač'an taradalo he bəxt'əvəre!