83
83-ci Ǐvel mə̌ğ
Asafi Ǐvel mə̌ğ.
1 Ay Buxačux, şip' ma çurpa,
Vi səsə c'evk'a!
Va t'ǒǒx ma duğa, ay Buxačux!
2 Běğa Vi düşmənxo hetərt'un ěqeśe,
Běğa Va nifrətbalt'oğoy muz hetəre Vi loxol c'eysa!
3 Gireśi Vi azuk'a pisluğbseynak' əyitət'un sabsa,
Vi piin işiğ bakalt'oğoy turin oq'axunt'un kaše.
4 "Tumexun əfçibalyan me azuk'a,
S'i batk'ale millətxoy aranexun israilluğoy" next'un.
5 İçoğoy fikir sane me gireśit'oğoy,
Vi əleyinə əyitə sabiyorox moroxe:
6 Edomluyox q'a ismailluyox,
Moavluyox q'a acarluyox,
7 Gevalluyox, ammonluyox, amalegluyox,
Filist'luyox q'a surluyox.
8 Hələ aşurluyoxal şot'oğoy tərəfe c'ovake,
Lut'axun bakit'oğot'un köməybsa şot'oğonal!
9 Midyanluğoy ğina bada şot'oğo,
K'işon oqe t'ǒğǒl Siseri q'a Yavini bel eçerit'oğo eça şot'oğoy bel.
10 Barta En-Dora k'as'eśi barit'oğollarik'q'at'un baki,
Barta mot'oğoyal meyidxo sal ext'i oç̌alaxp'al maq'an baki.
11 Oreva q'a Zeeva ak'est'i ğina şot'oğoy s'ilat'oğoval ak'est'a,
Zevaha q'a Śalmuna bit'oğo şot'oğoy kalat'oğoval ba.
12 "Buxačuğoy İz sürünə otarişala oç̌alxo beş kiyel badalyan" piyoroxe şorox!
13 Muşen ěqevk'ala toz,
Fupi taşala kološ k'inək' ba şot'oğo, ay Buxačux!
14 C'ələy arux baft'i usum bok'ala k'inək',
Yaloven buruxmoğo pula q'ic'p'i qayk'amin haq'ala k'inək'
15 Haq'a şot'oğoy pula Vi zorba muşen.
Vəlvəlinə bada şot'oğo Vi tufanen!
16 Biyaburba şot'oğo,
Barta İz s'i Q'ončux bakalt'u qə̌věśeq'at'un!
17 Barta içoğoy ömürin axıral śirik' ç̌omə̌yin mandi ot'p'eq'at'un,
Əfçibaki tağamin içoğoy bula alabes maq'at'un baki.
18 Barta Va, İz s'i Q'ončux bakalt'u çalxeq'at'un,
Avabakeq'at'un me dünyəni kalo Vi baksuna, ay Ala Arśi Buxačux!