80
80-ci Ǐvel mə̌ğ
Fark'alxoy dəst'in kalat'aynak'. Asafi "Gěše vard k'inək' gözəl bakala irəziluğ" uk'ala faren mə̌ğěğala Ǐvel mə̌ğ.
1 İbaka yax, ay İsraileynak' sa Çoban baki
İosifi nəsilə İz sürünə běğala k'inək' běğalo!
İşiğ saka, ay angelxoy arane Arśiyo,
2 Ak'est'a Vi zora Efraimaxun, Binyaminaxun saal Menaşşenaxun baki tayfoğo.
Eki çark'est'a yax!
3 Ay Buxačux, yax süft'in k'inək' bəxt'əvər ba,
Barta Vi ük'el bask'i çark'eśes baken yan!
4 Ay Q'oşuniQ'ončux bakala Buxačux,
Hələ heq'ədər Vi azuk'i xoyinša nu ibaksuna laxi əcuxləyinşakalnu Hun?
5 Beş piin neğenen boşevk'i Hun yax šumen boşevk'ala k'inək',
Neğen q'uc'pest'i yax bol-bol.
6 Hərrəmine bakala azuk'xone suna baft'i beş oç̌alxo görə,
Axšumi gayan baki yan düşmənxoynak'.
7 Ay Q'oşuniQ'ončux bakala Buxačux, yax süft'in k'inək' bəxt'əvər ba,
Barta Vi ük'el bask'i çark'eśes baken yan!
8 Misirəxunen eçeri yax Hun,
Azuk'xo şəp'eśi sa c'ap'e t'ink' k'inək' bint'i yax me oç̌ala.
9 Me c'ap'e ganun təmizbi həzirbi,
Şot'inal tum saki avuzebaki me ölkinə.
10 Buruxmoğoy loxole xoji saki şot'in,
Kakala xodurxone iz taymoğon but'k'i.
11 Şot'ay taymux taśi t'e bel bakala dənizəne p'ap'i,
İz c'ik'urxo Yevfrat oqe t'ǒğǒle hari c'eri.
12 Het'aynak'en Hun me t'ulluği hərrəmine bakala çəpərə śarpi?
İsəəl hər c'ovakalt'in iz kula boxodi şot'ay meyvinəxun çuneksa!
13 Mone, çölnə bǒq'ene şit'e şot'ay tuma,
Ə̌qnə heyvanxone k'arame şot'ay taymoğo.
14 Ay Q'oşuni Q'ončux bakala Buxačux, beş loxol běğa p'urum!
Ak'a yax Vi bakala ganuxun,
Vi kula zap'mapa me c'ap'e loxolxun.
15 Vi kiin lasaki me t'ulluğa,
Vi běği kalabi me calğina efa.
16 Mone, k'as'p'i bok'ost'unbi Vi bit'i c'ap'a düşmənxon,
Vi əcuğon biq'i yaq'abi cazinane zap'e Vi azuk'en.
17 Ma zapa Vi kula Vi c'ək'p'it'ay loxolxun,
Vi kiin zorbabi me azuk'i loxolxun ma ext'a Vi kula.
18 Ç̌o teyan taradon yan Vaxun!
Alaba yax biti ganuxun, barta Vi s'iya duği afırık'en yan!
19 Ay Q'oşuniQ'ončux bakala Buxačux,
Yax süft'in k'inək' bəxt'əvər ba,
Barta Vi ük'el bask'i çark'eśes baken yan!