79
79-ci Ǐvel mə̌ğ
Asafi Ǐvel mə̌ğ.
1 Ay Buxačux, Va nu çalxala azuk'xone baśi Vi oç̌ala,
Vi ı̌vel ganut'un murdarlayinşi şot'oğon,
Yerusalimat'un xarabina c'urevk'i!
2 Göynul purk'ala q'uşurxoynak' yemt'un bi Vi k'ulurxoy meyidxo,
Çöle tarak'ala heyvanxoy běšt'un boseri Vi yaq'en tağalt'oğoy p'uri bədənə!
3 Şot'oğoxun bari p'iye boş batek'i Yerusalim,
Meyidxo oç̌alaxp'alal tene baki sal!
4 Q'onşiğoynak' axšumi gayan baki yan,
Q'inəyinşt'unbsa, k'əşinen ak'est'i lağat'un haq'sa yax!
5 Ay Q'ončux, Vi əcuğ hevaxt' bask'ale?
Həmişəluğe yəni Vi bok'osp'i śik'ala me əcuğ?
6 Şot'o Va nu çalxala millətxoy,
Va nu bul k'os'bala azuk'xoy loxol śipa.
7 İak'ovi nəsilə k'as'p'i śipiyoroxe şorox,
Beşi oç̌alxo vərənbiyoroxe!
8 Beş bavoğon əşp'est'i günaxi cazina yax ma zapest'a,
Vi ük' bok'ospsuni k'ə baksuna ak'est'a, eki usum p'ap'a,
Yast'a hal tene mande ene!
9 Va görə Vi s'ine bu, ay yax çark'est'ala Buxačux,
Yax kul boxoda!
Vi s'iya görə Vi kalaluğa ak'est'i yax çark'est'a,
Beşi günaxxo bağışlayinşa!
10 Ma barta buxačuxsuzt'oğon
"Maya p'oy mot'oğoy Buxačux?" pi lağa haq'at'un.
Ak'est'a şot'oğo k'ən bsa Hun Vi azuk'i p'iya śik'alt'oğo,
C'evk'a şot'oğoxun mot'ay həyifə.
Barta mot'o ak'i beş ük'q'an çaxeśi!
11 İbaka düşməni kiyel bakalt'oğoy şivana Hun,
Vi zorba kula boxodi çark'est'a me bisuna tağalt'oğo.
12 Beş hərrəmine bakala azuk'xoy piyorox isə barta içoğoy ǒyneq'an bari,
Barta Va pit'oğoy əvəzə vǔğq'at'q'at'un ödəyinşi, ay Q'ončux!
13 Vi sürünəxun bakala me q'uziğon,
Vi azuk'enal həmişə Va tərifləyinşale,
Yaxun oşa eğala nəsilxonal Vi s'iya alabale!