78
78-ci Ǐvel mə̌ğ
Asafi ögüd-nəsyət tadala Ǐvel mə̌ğ.
1 Ay bezi azuk', bez zombsuna ǔmǔxlaxanan,
Bez uk'alt'oğo ibakanan.
2 Məsəloğon əyitk'oz,
Dünyə yaranmişakit'uxun mağay c'ap' mandit'oğo bayanboz.
3 Hetər ki, beş bavoğone yaynak' exlətp'e,
Hetər ki, yanal şot'oğoxunyan ibaki avabake.
4 Avabakest'alyan yan mot'o beş nəvoğo:
Saycə alxışen ǰomo eçes bakala Q'ončuğoy əşurxo,
Şot'ay zora, biq'i bito nu ak'eśi əşurxo
Exlətp'alyan yan oşin eğala nəsileynak'!
5 İak'ovaxun bakit'oğo İz buyruğxone tadi Şot'in,
İsraila İz k'anunxone avabakest'i.
"Ef əyloğoval mot'o zombanan" pine tapşurbi beş bavoğo.
6 Metər pine ki, barta oşin eğala nəsilenal avabakeq'an,
Şot'oğoxun baki əyloğonal oşa içoğoy əyloğoynak'q'at'un exlətp'i.
7 Buxačuğoq'at'un umudbaki,
Şot'ay biq'i əşurxo eyexun maq'at'un c'evk'i,
Şot'ay laxi yaq'enq'at'un taśi barta.
8 T'e vədə içoğoy bavoğollarik' tet'un bakon,
Şot'oğollarik' içoğoy ǰomoy tüşen tağala,
İçoğoy yaq'a aç̌esp'i sa nəsil tet'un bakon!
Buxačuğoxun ə̌xilt'uniy şorox,
Şot'oxun ğaç̌eśi irəziluğa axıral śirik' əməltet'unbi şot'oğon!
9 Efraimi nəsiləxun bakala q'oççağxo běğanan:
Ox-kamana içoğoy kiyel ext'it'un davina c'eri şorox,
Ama p'urumal düşməni běš çurpes tet'un baki, c'eri t'it'alat'un baki.
10 Şot'o görə ki, Buxačuğoy içoğoxun ğaç̌eśi irəziluğa əməltet'unbsay,
Şot'ay laxi yaq'en taysun tet'un çuresay.
11 Eyexun c'evk'et'uniy şot'oğon Şot'ay biq'i əşurxo q'a ak'est'i möcüzoğo!
12 Manu ki, Buxačuğon Misirə,
Śoan şəhəri düzənluğxo ak'est'i t'e möcüzoğo
Şot'oğoy bavoğon içoğoy piint'un ak'ey.
13 Şot'in dənizi xena şot'oğoy yön saal tərs tərəf bari k'inək' efi
Şot'oğo dənizi tumexun, q'ari ganuxune c'ovakest'i.
14 Ğenaxun asoyi boş,
Üşe isə işiğ sakala aruğoy boş
Şot'oğoy běš taśi yaq'e ak'est'ay.
15 Q'ayana qı̌bi xene c'evk'i Şot'in ams'i oç̌ala,
Bə̌ğə̌loy orayini xe k'inək' as'ar xene tadi şot'oğo.
16 J̌ěnaxune c'erey
Şağapi oq k'inək' tağala t'e xe.
17 Ama günax əşp'est'unaxun kul tet'un haq'i şorox,
Ala Arśit'u hik'k'al bi
P'urum içoğoy ǰomont'un taysa burqi ams'i oç̌ala bakat'an.
18 Buxačuğoy hər şeya başarbsunaxunt'un şüpələyinşaki,
İçoğoy ük'exun c'ovakala ukunxo çuresunent'un sinəyinşi Şot'o.
19 "Çətin ukest'es bakale yax me ams'i oç̌ala Buxačuğon" pi
Şot'ay bač'anexunt'un əyitey.
20 Metərt'un nexey:
«Q'ayana duği xene c'evk'i Şot'in,
Oq k'inək' tağala xene c'eri t'et'iin.
Ama šum tades tene bakon yax Şot'in,
Çətin me azuk'i ǰomo yeq'en boşevk'i girbes bakane!»
21 Q'ončuğoyal mot'o ibaki əcuğone biq'i,
Bəc'ük'eśi Şot'ay əcuğ İak'ovi nəsili loxol,
Hirsene duği Şot'o israilluğoy me əyitə ibakat'an.
22 Şot'aynak' ki, şot'oğon Buxačuğo bač'an tet'un taradi,
Tet'un věbaki ki, Şot'in içoğo çark'est'ale.
23 T'e vədə əmirebi Buxačuğon göyurxo,
Şot'oğoyal ǰomone ə̌meśi.
24 Mannane bari alaxun şot'oğoy loxol ağala barala k'inək',
Göynuxun šume tadi şot'oğo Buxačuğon.
25 Amdarxonal angelxoy ukala ukunaxunt'un kəyi,
Boşşamine ukest'i şot'oğo.
26 Běğc'eğala tərəfəxun eğala muşe ěqevk'i Şot'in göynul,
Güney tərəfəxun eğala muşe eçeri İz zoren.
27 T'emane tadi ki, belxune bari yeq' şot'oğoy,
Dənizi börine bakala q'ume hama q'uşurxone yaq'abi şot'oğoynak'.
28 T'e q'uşurxo hari şot'oğoy çurk'ala gala,
İçoğoy çadırxoy hərrəminene bist'ay.
29 Ut'unksay şot'oğonal içoğoy ǰomoxun baramin,
P'at'unp'i içoğoy arzuna şorox!
30 Ama yeq'a hələ k'əc'p'i q'uc'p'inut,
Şo içoğoy q'oq'exun hələ c'ovakinut
31 Baredi Buxačuğoy əcuğ şot'oğoy bel!
İsrailluğoy ən zorbat'oğone k'as'p'i-śipi,
Q'oççağxone duği saki!
32 Metər əşure eysay içoğoy bel,
Ama p'urumal günax əşp'est'unaxun kul tet'un haq'say şorox,
Şot'ay ak'est'i me möcüzoğo větet'unbaksay.
33 Buxačuğonal mot'o görə içoğoy ömürəne puçbi,
Biyamin q'ı̌ye boş c'ovak'ala yəşəyinşaxun başq'a sa ği tet'un ak'i şot'oğon.
34 Hari içoğoy axır p'ap'at'ane pulmux qayesay şot'oğoy,
T'e vədət'un burqsay Buxačuğo qə̌věsa,
Şot'o k'alpi xoyinšpsa.
35 T'e vədəne içoğoy eyex bafst'ay ki, Şo içoğoynak' sa q'aya,
Ala Arśiyo içoğoy çark'est'es bakala Q'ončuxe!
36 Ç̌oyexunt'un içoğo pěšmanbaki k'inək' taşt'ay,
Əfçine əyitey içoğoy muzin.
37 Ük'e boş isə hələ Buxačuğoxun ə̌xilt'uniy,
Şot'ay içoğoxun ğaç̌eśi irəziluğa əməltet'unbsay şot'oğon.
38 Ama Buxačuğon İzi ük'bok'al baksuna görə şot'oğo bağışlayinşebsay,
Əfçitenepsay şot'oğo.
Bask'esest'ay İzi hirsə gele vədə,
Enefsay İçu İzi bəc'ük'eśi əcuğo şot'oğoy bel śipsaxun.
39 Avaney şot'oğoy günaxi běš aciz mandala sa insani bala baksuna,
C'ovaki tağala sa muşaxun avuzin nu baksuna.
40 Hema kərəmt'un şorox ams'i oç̌ala Şot'ay laxi k'anunxoxun c'erey?!
T'e çölmoğo içoğoy ǰomon taśi
Şot'ay əcuğo hema kərəm biq'est'una bǒq'ə̌lpi çark'ala şey tene!
41 Hər dəfəl Buxačuğoy kiyexun ayeğalt'oğoxun şüpələyinşaki
T'ǒp'ěvt'unksay israilluğoynak' Ǐvel Bakalt'u!
42 Şot'ay kiyexun hər əş ayesuna,
İçoğo düşməni kiyexun ext'i çark'est'una eyexun c'evk'et'uniy şot'oğon.
43 Misirə bit'oğo,
Śoani düzənluğa ak'est'i möcüzoox eyex tene bafst'ay şot'oğoy.
44 Misirə bakala oqurxoy xenane p'iya taradi Şot'in,
Şuk'k'alenal xe ǔğes tene baki.
45 Duğala t'at'ure yaq'abi misirluğoy loxol,
Vərənbala bědalaq'xone eçeri buybi ölkinə.
46 Əkinə çərtk'ənxone ukest'i,
Meqene k'as'p'i śipi şot'oğoy oç̌ala k'ə buneysa bitova.
47 Şot'oğoy t'ulluğxone təəren əfçibi,
İncilnə xodurxone alaxun barala buzen t'api.
48 Beliyoxe təəri oq'a mandi şot'oğoy,
Sürüğone s'ə̌q'en duği.
49 İzi bəc'ük'eśi əcuğo q'a hirsəne śipi şot'oğoy loxol,
Q'arğişi q'ončux bi bəloğone badi şot'oğoy bula,
İçoğoy bisuni xavarat'un haq'i şot'oğon besp'ala angelxoxun.
50 Bask'estenedi Şot'in İz əcuğo,
Şot'oğoy elmoğoynak' bisun eğat'an İz kula boxodi çark'estenedi -
K'as'eśi bart'undi şorox azar baft'i!
51 Bisune hari Xame nəsiləxun bakalt'oğoy k'ojin süft'in ğarmoğoynak',
Nanay tapanexun c'eri çuresa insani,
Çuresa heyvani süft'in ərkəy baloğoy sayco tene mandi Misirə!
52 İzi azuk'eynak' isə sa çoban baki
İz kiine ams'i oç̌alen taşeri şot'oğo.
53 Şot'ay t'ǒğǒl q'ı̌ hik'ə tet'un avay,
Hik'k'alal tene baki şot'oğo!
Şot'oğoy düşmənxo isə dənizi boş batk'i k'as't'unśi!
54 Metərt'un şorox hari içoğoynak' həzirbaki ı̌vel oç̌al burqeğala gala,
Buxačuğon İzi bi buruğoy tumel c'eri.
55 Millətxone şəp'eśi Buxačuğon şot'oğoy běšt'an,
T'e oç̌alxo cöybi mülk k'inək'e tadi şot'oğo,
İçoğoy nu bakala k'ojurxot'un baśi arśi İsrailaxun baki tayfoox!
56 Ama şorox p'urumal Buxačuğoy kiyexun ayeğalt'oğoxun şüpələyinşt'unbaksay,
Ala Arśit'ay laxi yaq'en tet'un taysay,
Şot'oxun ğaç̌eśi irəziluğa tet'un əməlbsay.
57 İçoğoy bavoğollarik' tadi əyiti loxol nu çurk'alorox,
Qı̌ yaq'axun qaybakaloroxey şorox.
Küt xişt'ik'əxun sa xeyir nu bakala k'inək',
Şot'oğoxunal sa xeyir tene buy.
58 Şot'in q'erəz buxačuxxo nu portpsuna avabaksun,
Taśi şot'oğo bult'un k'os'bsay,
İçoğoynak' binik' buxačuxxo düzbi Şot'ay əcuğot'un biq'est'ay.
59 Buxačuğoyal biin tene haq'i mot'oğo bitova,
Hirsene duği Şot'o me əşurxo ak'at'an,
Taranedi Şot'in İz ç̌oya israilluğoxun.
60 Tene çurpi İz bakala gala Şo,
Şilona, amdarxoy çadırxoy arane laxeśi çadıra ams'ine efi Şot'in.
61 İrəziluği sanduğane düşməni kiyel tadi,
İzi zora, izi tamtarağa ak'est'ala irəziluği sanduğa!
62 Q'ılınci ǰomone tadi İz azuk'a Şot'in,
İz piyexune biti İçeynak' c'ək'p'iyorox.
63 Cəyil ğarmoğoy aruğo bok'i barst'unen
Xuyərmuxe işq'ara tağala mandi.
64 Běyinšxot'un k'as'p'i q'ılıncen şot'oğoy,
İçoğoy çupuxxoy piin neğe q'aribaki.
65 Ama muğurebaki Q'ončux!
Bə̌ğə̌loy sa nep'axun muğurbakala k'inək',
Ǔği fine təsir c'ovakit'uxun oşa içul hari sa q'oççağ k'inək'.
66 Duği şəp'eśi Şot'in İz düşmənxo,
Şoroxal qoş qaybaki biyaburt'unbaki həmişəluğ.
67 Tene çureśi Şot'in İosifi nəsiləxun bakalt'oğoy çadıra,
Efraimi tayfina t'ǒǒxebi Şot'in.
68 İuday tayfina,
İz ük'e bask'i Sion buruğone c'ək'p'i!
69 Göyurxollarik' ost'aar,
Me dünyə k'inək' həmişəluğ laxeśi ı̌vel gane biq'i İçeynak'.
70 İz k'ul bakala Davidane c'ək'p'i Şot'in,
Şot'o iz běğala eğelxoxun cöybi
71 Eçeri İak'ovaxun baki nəsileynak'e çoban laxi.
Lanexi ki, iz sürünə běği k'inək'
İsəəl hari İçeynak' c'ək'p'i azuk'a,
İsrailaxun bakit'oğoq'an běği.
72 Davidi kalaluğbsunenal ak'esedi izi müdrik baksuna q'a
Təmiz ük'en baki şot'oğoy q'ayğina çurpsuna.