77
77-ci Ǐvel mə̌ğ.
Fark'alxoy dəst'in kalo bakala Yedutuneynak'. Asafi Ǐvel mə̌ğ.
1 Buxačuğoz k'alpi zu,
Şot'ay za ibaksunaz xoyinšp'i.
2 Bez t'ar ğine zu Q'ončuğoz qə̌věśi,
Bez bula alabi afırızpi dirist' üşe,
Arxayin tez baksay zu.
3 Vaxunez fikirbsay zu ǒnek'a, ay Buxačux,
Fikiri kiyexun elmuxe c'eysay bezi.
4 Bez piye nep' tene eysay,
Q'ubarbsaxun əyite tambakey bezi.
5 C'ovaki taśi ğimxoxun,
Baki əşurxoxunez fikirbsay zu.
6 Vaynak' mə̌ğpi mə̌ğure bez eyex bafst'ay üşe bakat'an,
Zu zaxunez əyitk'ala baksay,
Vaxun xavar haq'sun çureğalorox bez beynexun tene c'eysay.
7 Yəni həmişəluğe taradi yaxun Q'ončuğon İz ç̌oya?
Yan İz ük'e basteyanksa ene?
8 İzi nu badalbakala çuresunane həmişəluğ kambi yaxun?
Yəni İz tadi əyitə bex tene p'ap'esp'al ene sal sa vədə?
9 Kamebon ki Buxačuğon yaxun İz ük' bok'ospsuna?
Yəni əcuğon biq'i İzi gorox eysuna t'ǒǒxe bon?
10 T'e vədə metərez pi zu: «Za ən gele q'ač't'alo
Ala Arśit'ay ene yaxun İz kula zapsune!»
11 Ama eyexun tez c'evk'al zu Q'ončuğoy biq'i əşurxo,
Şot'ay damna döörəst'ə biq'i nu ak'eśi əşure eysa bez beyne.
12 Matez manst'a zu Vi kiyexun ayeśit'oğoxun fikirbat'an,
Vi biyorox bito bez piin běš eğat'an!
13 Vi biq'i əşurxon Vi ı̌vel baksunane ak'est'a, ay Buxačux!
Şuva p'ap'es bakon Va buxačuxxoy boş?
14 Nu ak'eśi əşur biq'ala Buxačuxnu Hun,
Azuk'xo Vi zora ak'est'iyonu!
15 Vi kula boxodi Vi c'ək'p'i azuk'a,
İak'ovaxun q'a İosifaxun bakit'oğo çark'est'iyonu Hun!
16 Ay Buxačux, xeyurxoy,
Dənizə bakala xeyurxoy pulan haq'i Hun!
Bə̌ğə̌loyluğxone Vi běš t'ut'upi!
17 Ağalane bari gireśi asoyxoxun,
Göye gürultin səsene haq'i dünyənə,
Vi boseri oxure pure unkon göynul s'ə̌q'en duğat'an!
18 Tufani səsəne gərbaksay göye gurultinen eğala Vi səs,
Vi işiğane saksay duğala s'ə̌q'en,
Oç̌ale ǰı̌k'eśi iz ganuxun galey!
19 Dənizi bı̌yexun yaq'en qaypi Hun,
Bə̌ğə̌loyluğxoy boşt'anen c'ovaki taśi.
Vaxun oşa sa irizəl ten efi ama!
20 Vi azuk'eynak' sa çobanen baki Hun,
Şot'oğo Moiseyi q'a Aaroni kiinen taşeri.