81
81-ci Ǐvel mə̌ğ
Fark'alxoy dəst'in kalat'aynak'. Git't'iten mə̌ğěğala Asafi mə̌ğ.
1 Yax zorba bala Buxačuğo mə̌ğpi tərifləyinşanan,
İak'ovi Buxačuğo efi heq'ədər mǔq baksuna ak'est'anan!
2 Dəf duğanan, arfa q'a tar farpanan!
Barta fare səsq'an c'eri,
Barta ük' qayk'ala səsurq'an beş ǔmǔğo laft'i.
3 Şeyp'ur farpanan ef mǔq ğimxost'a -
Axsibayxost'al, təzə xaş c'eysuna c'ovakest'ala mərəkəyxost'al.
4 Şot'o görə ki, metəre bürüşe İak'ovi Buxačuğon,
Metəre əmirbe israilluğo.
5 İosifaxun bakit'oğone avabakest'i Şot'in me q'aydoğo.
Şorox Misirəxun c'eğat'an,
Şot'oğoxun içoğoy memaçağ nu ibaki sa səsen əyitk'at'ane pi mot'oğo bitova:
6 «Bı̌hi yükəz ext'i Zu efi ə̌mnəbelxun,
Zülüm tadala əşləxunez ef elmoğo çark'est'i.
7 Zanan k'alpi və̌n efi t'e t'ar ğimxo,
Zuval və̌x çark'esezdi.
Göye gürultinenez coğab tadi və̌x,
Efi Zaxun nu şüpələyinşaksunaz yoxlayinşi Meriva xene t'ǒğǒl.
8 İbaka Za, ay Bez azuk', nexzu va!
Ene hetər uk'az ki, va p'ap'ane, ay İsrail!
9 Vi Zaxun q'erəz buxačuxxo nu bakalane,
Q'erəz azuk'xoy buxačuxxo bul ma k'os'ba!
10 Va Misiri oç̌alaxun c'evk'i
Vi Buxačux bakala Q'ončux Zuzu.
Va busa tez bark'on Zu, hik'k'alaxun koruğ aksa tez bark'on!
11 Ama Bez pit'oğo tene əməlbi Bez azuk'en,
Bez laxi k'anunxon tene taśi.
12 Zuval pizu barta taśeq'at'un içoğoy ǰomoy tüşen,
Ezfi şot'oğo iz axır bayinq'un bakala yaq'a!
13 K'ə bakoy Bez azuk'en Za ibakiyniy,
İsrailluyox Bez laxi yaq'axun nu c'eriyniy?
14 T'e vədə düşmənen iz pula q'ic'p'i qayk'aminez şot'o iz gala arśevk'oy Zu,
Bez kiin içoğoy belxun duğsuni k'ə baksuna ak'esezdoy şot'oğo!
15 Bez loxol ěqeśiyorox hari Bezi turin oq'at'un bitoy,
İçoğoy caza zapsuni axır tene bakoy.
16 Və̌x isə c'ək'eśi arumenez běğoy,
Çölexun girbi ən muč'a uč'enez ukest'i bəsləyinşoy!»