74
74-ci Ǐvel mə̌ğ
Asafi ögüd-nəsyət tadala Ǐvel mə̌ğ.
1 Ay Buxačux, het'aynak'en yaxun həmişəluğ ç̌o taradala baki Hun?
Vi sürünə bakala me q'uziğoy loxol het'aynak'e Vi əcuğ bəc'ük'eśi?
2 Vi hələ beş kalboğoy döörəxun Vaynak' c'ək'p'i azuk'a nu aksuna ma laxa:
Toyen haq'eśi, Vi s'i iz loxol bakala sa neymətt'un şorox!
Vaynak' məsk'ən bi Sion buruğo eyexun ma c'evk'a!
3 Eki běğa t'e ı̌vel ganxoxun k'ə mande,
Śarpi śipene düşmənen bitova!
4 İçoğoy ěkat'un ə̌qst'a Vi məsk'ən saki ganu,
S'iyat'un śampi laxe içoğoy t'iya!
5 C'ələye baśi xodt'un budayinşbsa unkon,
T'etərt'un tavara alabi fə̌lst'a!
6 T'e bəzəylu bariğoxun hik'k'al tene mandi,
Çəküçen q'a güpunent'un şot'oğoy axıra c'eri!
7 Vi ı̌vel ganut'un bok'osp'i şot'oğon,
Vi s'iyal bakala məsk'ənət'un murdarlayinşi!
8 "Me azuk'a tumexun əfçibalyan!" pi
Beşi Va bul k'os'bala ganxot'un bok'osp'i śipi!
9 Nə göynuxun sa nišane ak'esa yaynak',
Nəəl sa xavareçalyax bu ene!
Şiin k'ə ava hələ heq'ədər mot'o portp'ala bakalyan!
10 Ay Buxačux, hələ heq'ədər düşməneynak' axšumi ga bakalnu Hun?
Va laft'ala əyitmoğo hələ gele ibakalyan?
11 Axıri het'aynak'en Vi kula zap'e?
Vi yön kiin yumburuğ k'ə baksuna ak'est'a,
Şot'oğoy bula duğa č'ak'p'a!
12 Ama bezi Buxačuxe bu,
Hələ burqesunaxun bezi Padçağ bakalone Şo.
Oç̌ali ç̌oye çark'esun eçalonu Hun!
13 Dənizxoy xenan t'ağaybi,
Xene boş bakala p'ə̌bulla dizik'i ozanan c'urumpi boseri.
14 Bitot'ay pula haq'i, ama Vaxun nu başarbi me heyvani bulan duği č'ak'p'i,
Şot'o çöle bakala heyvanxoynak' yemen bi Hun!
15 Orayinxone ǰalpi c'eri,
Posp'i xenen çəyləğxon ǰomol śirik' buybi Hun,
Bə̌ğə̌loy oqurxoy isə xenan es'evk'i!
16 Běğa q'a xaşal göynul Hunen laxe,
Şüyal Vi ǰomone taysa, ğiyal.
17 Oç̌ali binorinan laxi Hun,
Ǐǰeninaxun Vi əyiten c'eri,
J̌oğula Vi əyitenyan baysa yan.
18 Ay Q'ončux, düşməneynak' axšumi ga baksuna,
Va nu çalxala buxačuxsuzt'oğoy ǰomo bafst'una nu aksuna ma laxa!
19 Ma barta Vi bəsləyinşi göyərçin ə̌qnə heyvanxoynak' yem bakane,
Me Vi fağırxoy loxolq'an baki Vi pul həmişə!
20 Běğa Vi yaxun ğaç̌eśi irəziluğaxun k'ə mande!
Bayinq'luğen haq'ene dünyənə -
Mani t'ǒǒx běğayin amdarxoy suna zor əşp'est'unayan aksa.
21 Ma barta me zülümi boş bakalorox turin oq'a ç̌axç̌uxeśi tağane,
Barta Va tərifi q'ončux bi Vi s'iyaq'at'un alabi fağırxon q'a goroxt'oğon!
22 Hayza Vi şu baksuna ak'est'a, ay Buxačux!
Me əşlə Hun běğa,
Va nu çalxala buxačuxsuzt'oğoy
Va hik'k'ali gala laxsuna cazasuz ma efa.
23 Nu aksuna ma laxa Vi düşmənxon içoğoy bula alabsuna,
Nu ibaksuna ma laxa Va nu çureğalt'oğon içoğoy ǰomo eğalt'u upsuna!