Girke xibimci hissə: 73-89-ci Ǐvel mə̌ğurxo
73
73-ci Ǐvel mə̌ğ
Asafi Ǐvel mə̌ğ.
1 Běğa Buxačuğon israilluğoynak',
Běğa İz yaq'en tağalt'oğoynak' heq'ədər xeyirxax əşure biq'sa!
2 Ama zu bez yaq'a aç̌espsaxzuy,
Düz yaq'axun c'eyseynak' male mandey bezi.
3 Pist'oğoy běš baysuna,
İçoğoxun irəzit'oğoy şaat' ğina ak'i paxılluğezbsay zu!
4 Dərd hik'ə tet'un ava,
Ömüri axıral śirik' azar tene lafst'a şot'oğo.
5 Hik'k'alaxun koruğ tet'un zap'e,
Tur ǰěna tene lafst'a şot'oğoy.
6 İçoğoxun irəzi baksuna sal c'ap'tet'unpsa,
Amdarxo əzyət tast'unaxun fərəxləyinşaki
Hələ sa mot'o piyelal bat'unst'a.
7 İçoğoy t'olnu tet'un p'aq'sa,
Ük'e pisluğaxun başq'a hik'k'aleynak' ga butene şot'oğoy!
8 İçoğoy əş lağa haq'sune,
J̌omoxun c'eğala hər əyit amdarane lafst'a,
Exləti bul q'ı̌dest'un q'a pul haq'sune şot'oğoy!
9 Göynuxunt'un taysa,
Mani mərəkəye arśayt'un içoğoy ǰomo tene giresa!
10 Camaatenal hələ arśi mot'oğo ǔmǔxelaxsa,
Şot'oğoy əyitmoğont'un nəfəs haq'sa!
11 Buxačuğoy hər şeya aksaxun,
Ala Arśit'ay piyexun hik'k'al c'ap' nu manst'unaxun xavar butene şot'oğoy!
12 T'ema arxayint'un ki,
İçoğo narahat bala hik'k'al butet'ux me pist'oğoy,
Var-dövlət avuzbsunaxun başq'a dərd butet'ux şot'oğoy!
13 İsə t'etəre c'eysa ki, nə bezi düz yaq'en taysuni,
Nəəl günaxaxun ə̌xil çurpi təmiz manst'uni məənə tene bu?
14 P'oy ene het'aynak'ez za hər ği əzyət tast'ay,
Het'aynak'ez savaxt'an bez pula qayk'ala k'inək' za caza zapest'ay?
15 Ama təə! Metər pi bakiyzuy,
Vi c'ək'p'i azuk'axun baksuna laftezdoy zu!
16 Düze, mot'oğo tam q'amişakamin
Zaynak' çətine ak'esay me əş.
17 Ama Vi bakala ı̌vel galaz baśi zu sa ği,
Bez pulmuxe qayeśi unk'on t'e vədə,
Me pist'oğoynak' həzirbakit'oğoz ak'i zu!
18 Mone, şot'oğoy tağala yaq'a fırs'ek'al balnu Hun,
Saki xork'alnu, bula alabi hayzes tet'un bakal!
19 Q'ı̌yen haq'ale şot'oğo,
Bürdən t'etər əfçibakalt'un ki, içoğoxun tozal tene mandal!
20 Vi şu baksuna ak'est'alnu Hun me pist'oğo, ay Q'ončux,
Sa nep' k'inək' hari c'ovakalt'un şorox!
21 Q'ubarbala vədəmuxe buy bezi,
Dərde kiyexun zaynak' ga tez bə̌ğə̌bsay.
22 Q'ammazzuy, hik'k'al q'amiştezuy,
Vi piyes heyvanaxun avuzin sa ga tezax buy bezi.
23 Ama isə azaksa ki, Hun həmişə zaxunnu,
Vi kula zaxun zap'k'ala vədə tene bake Vi!
24 Hunnu za düz yaq' ak'est'alo,
Hun balnu za hörməti q'ončux!
25 Bez best'a Hun bakit'uxun oşa
Q'erəz şuva eht'iyəc bakes bakon bezi, ay göynul bakala bez Buxačux?
Me dünyəne şuz çureśez bakon ene?
26 Bez ük' xə̌xə̌yeğala vədine za ük' tadalo,
Halnuxun bitat'an za turelbalo Hunnu, ay Buxačux!
Bez paynu koft'i, bez k'odoğo śameśi neymət Hunnu!
27 Vaxun ə̌xil bakalt'oğoy axır tene bakal,
Əfçibalnu Hun Vi laxi yaq'axun c'erit'oğo!
28 Zu isə Va ı̌šabaksunenez şaat'luğ bə̌ğə̌bsa,
Vast'az umudi ganu aksa, ay bitot'uxun üst'ün bakala Q'ončux Buxačux!
Vi biq'i əşurxo bez muzel eçeri car sakoz zu!