72
72-ci Ǐvel mə̌ğ
Solomoni Ǐvel mə̌ğ.
1 Ay Buxačux, Vast'a bakala düzgünluğaxun tada padçağa,
Barta Vallarik' bitot'ay loxol sa piinq'an běği padçağxoy nəsiləxun bakalt'in!
2 Vi azuk'a düzgünluğenq'an divanbi,
Fağırxon şikəətbat'an bitot'ay loxol sa piin běğiq'an q'ərar c'evk'i.
3 Buruxmoğo bakala bolluğen azuk'i şaat' ğinax baksuna ak'est'ale,
Düzgünluğen yetişt'irişale təpoğo bakala xodurxoy bara!
4 Fağırxoy bač'ane çurk'ale padçağ,
Kəsibi baloğo çark'est'ale,
Pist'oğoy bula č'ak'k'ale şot'in.
5 Yaxun oşa eğala nəsilxonal bitot'in Va çalxale, ay Buxačux,
Běğ q'a xaş göynuxun əfçibakamin Va bul k'os'balxo bakale!
6 Śap'eśi q'oruğeynak' ağala k'inək',
Veçələyinşala oye tuma laft'ala xe k'inək' bakale padçağ!
7 Düzgünorox běš bağale me padçaği döörəst'ə,
Şaat' ği ak'alt'un şot'oğon heq'ədər ki, yan beş bula alabi göynul xaşyan aksa.
8 Oç̌ali me belxun t'e bel bito şot'ay kiin oq'a bakale,
Yevfrat oqaxun burqi lap t'e bel bakala dənizəl śirik'
Hər şeye loxol şot'in kalaluğbale.
9 Ə̌xil oç̌alxo yəşəyinşala azuk'xon şot'o bul k'os'balt'un,
Düşmənxon iz turin oq'a biti toz lamk'alt'un.
10 Tarşişi q'a dənizi t'e bel bakala oç̌alxoy padçağxon şot'aynak' payurxo eçalt'un,
Şebin q'a Sebin kalat'oğon şot'aynak' zənbilxo buybi yaq'abalt'un.
11 Şot'o bul nu k'os'bala padçağ,
Şot'ay q'ulluğa nu çurk'ala azuk' tene bakal!
12 Fağıri t'arnu p'ap'alo,
İzi şuk'k'al nu bakala kəsibi kiyexun biq'alo bakale şo.
13 Eht'iyəci boş bakalt'oğoynak' q'a bač'ansuzt'oğoynak' ük' bok'osp'ale şot'in,
Goroxt'oğoy elmoğo çark'est'ale!
14 Ext'ale şot'oğo zülüm zapest'ala zalımxoy kiyexun,
Axıri dəyərlune şot'oğoy elmux iz piyes.
15 Dirist'q'an baki padçağ, boxoy ömürenq'an baki!
Barta Şevaxun eçeri q'ızılq'at'un śipi şot'ay belxun oq'a,
Barta şot'aynak' afırıpi Buxačuğoq'at'un k'alpi üşe-ğena,
İçoğoy xeyir-bərəkətə kammaq'at'unbi şot'oxun amdarxon.
16 Barta ölkinə šum bolq'an baki,
Buruxmoğoy döşel bakala taxıla muşen duğat'an ük'q'an qayeśi.
Barta xodurxo oç̌alaq'an laft'i c'epi meyvin kiyexun,
Livana bakala gözəl xodur hik'k'alq'an baki şot'oğoy t'ǒğǒl.
Barta şəhərmoğo bakala amdarxoy say t'ı̌q'p'i c'eğala oye hamaq'an baki!
17 Barta padçaği s'i həmişəq'an t'ap'eśi,
Barta göynul bakala běğen tadala işiğ nu aç̌ala k'inək'
Şot'ayal k'ojin işiğ maq'an aç̌i.
Xeyir-bərəkətə şot'ay s'iya duği haq'alt'un azuk'xon,
Bəxt'əvər uk'at'an şot'o çalxalt'un!
18 Alxışq'an baki israilluğoy Buxačux bakala Q'ončuğo,
Nu ak'eśi əşur biq'ala Buxačuxe Şo!
19 Barta Şot'ay kala s'iya duği həmişə alxışp'eq'at'un,
Şot'ay kalaluğaxunq'an əyitp'i barta dirist' dünyənen!
Ammen! Ammen!
20 Memiya Yesseyi ğar Daviden śampi afırıyox çareksa.