71
71-ci Ǐvel mə̌ğ
Buxačuğon amdara iz q'oja vədineyal nu bost'eynak' bakala afırı.
1 Ay Q'ončux, zu Vaz bač'an tarast'a,
Sal sa vədəl ç̌omə̌yin tez bakon zu.
2 Vi düzgünluği k'ə baksuna ak'est'a, çark'est'a za!
Za ibaka, eki za kul boxoda.
3 Zaynak' c'ap'bakes bakala sa q'aya baki bez bač'ane çurpa,
Barta Vi sa əyiten çark'eśes bakaz zu,
Şot'aynak' ki, bez q'alal, q'ayal Hunnu!
4 Ay Buxačux, za şər bakalt'uxun,
Pis saal zalım amdari kiyexun çark'est'a.
5 Hələ əyelluğaxun Vaz arxayinbaksa zu,
Hunnu bez umudi ga, ay bitot'uxun üst'ün bakala Q'ončux Buxačux!
6 Zu nanaxun bakat'an bezi kiyexun biq'iyonu Hun,
Za me dünyəne eysuna köməybiyonu.
Va tərifləyinşoz zu həmişə!
7 Amdarxoy gelet'in za ak'i Vi yaq'ent'un taysa burqi,
Bezi Va bač'an tarast'unene bi mot'o!
8 Vaz tərifbsa, bez ǰomoxun ten bist'a,
Üşe-ğena Vi kalaluğaxunez əyite zu!
9 Bez q'oja vədineyal zaxun ə̌xilmabaka,
Bezi kiin-turin nu biq'ala vədine za bomasa.
10 Anksa düşmənxon hetərt'un bez bač'anexun əyite,
Bez elmoğo haq'sun çureğalt'oğon əyitə sabi
11 Metərt'un nex: «Ç̌oya taradene kot'oxun Buxačuğon,
Çark'est'al tene bakal kot'o!
Baft'anan kot'ay bač'anexun, şəp'eśi biq'anan!»
12 Ay Buxačux, za tək ma barta,
Eki usum p'ap'a, za kul boxoda!
13 Barta bez loxol şər bosalt'oğoy ç̌oyenq'an ot'p'i,
Tumexunq'at'un əfçibaki şorox!
Barta bez pisa çureğalorox ç̌omə̌yinq'at'un mandi,
İçoğoy bula alabes maq'at'un baki şot'oğon!
14 Ama bezi Va bakala umud sal sa vədine mal tene bakal,
Tərifi loxol tərif eğale Vaynak'!
15 Vast'a bakala düzgünluğaxun,
Vaxun eğala çark'esunaxun əyitk'oz zu üşe-ğena.
Axıri Hun yax tadala neymətxoxun əyitp'i çark'ala şey tene!
16 Bitot'uxun üst'ün bakala Q'ončux Buxačuxnu Hun,
Şuk'k'ali kiyexun tene ayeğon Vi biq'ala əşurxo!
Saycə Vast'a bakala düzgünluğaxun əyitk'oz zu!
17 Ay Buxačux, əyelluğaxun mağay za zomenbsa,
Hələl Vi biq'i nu ak'eśi əşurxoxunez əyitp'i car saksa zu.
18 Mot'o zaynak' gele ma ak'a, ay Buxačux, zaxun baka!
Barta q'ojabaki bez pop mas'i bakamin
Vast'a bakala zoraxun əyitp'i bayanbes bakaz!
Barta Vi kalaluğa bez muzel eçeri
Mot'o zaxun oşa eğala nəsiləl p'ap'esp'az!
19 Ay Buxačux, Vast'a bakala düzgünluğ me dünyəne p'aq'ala şey tene,
Göyurxone p'ap'sa şo!
Hunnu bito me nu ak'eśi əşurxo biq'alo,
Vallarik'o butene, ay Buxačux!
20 Gele bəlooxen yaq'abi Hun zaynak',
Běğa hetər çətinluğxoxunez c'ovaki zu.
Ama şaat' ğimxo q'ısmatbalnu Hun zaynak' p'urum,
Za t'e dünyənexun zapi c'evk'alnu.
21 Hörmətə avuzbalnu Hun bezi,
Za ük' tadalnu.
22 Tər farpi Vi s'iya alaboz, ay bez Buxačux,
Vi bez bač'ane çurpsuna mə̌ğen ak'est'oz!
Arfa farpi Va tərifləyinşoz, ay israilluğoynak' Ǐvel Bakalo!
23 Bez ük'e qayesa Vaynak' mə̌ğk'at'an,
Vaxun eğala çark'esuna ak'i mǔqezbaksa zu!
24 Vi düzgünluğa ak'est'i zaynak' bit'oğoxun əyitk'oz zu üşe-ğena,
Şot'o görə ki, mone, biyaburbi ç̌omə̌yinenbi Hun bez pisa çureğalt'oğo!