75
75-ci Ǐvel mə̌ğ
Fark'alxoy dəst'in kalat'aynak'. Asafi "za efa" uk'ala faren mə̌ğěğala Ǐvel mə̌ğ.
1 Şüküryanbsa yan Va, ay Buxačux,
Vi xojina tarakaloroxyan yan!
Vi ak'est'i möcüzoğot'un car saksa amdarxon.
2 Metəre pi Buxačuğon: «İz vaxt' eğat'an,
Bez laxi vədine ak'est'oz Zu düzgün divanbsuni k'ə baksuna!
3 Oç̌al iz ganuxun galk'ale t'e vədə,
İz loxol bakalt'oğoval q'ı̌yen haq'ale,
Ama şaat'ez ost'aarbe Zu şot'ay binorina!
4 İçoğoxun irəzit'oğo "və̌x bitot'uxun üst'ün ma biq'anan",
Şər bakalt'oğo "amdarxoy loxol q'ǒq'ǒzləyinşaksuna,
5 Göynuxun taysuna bosanan,
Bəsp'anan ǰomo buybi və̌x tərifləyinşbsuna" pizu».
6 Nə běğ c'eğala tərəfəxun, nə běğ batk'ala tərəfəxun,
Nəəl çölexun bakalt'ay kiyel tene içu alabsun.
7 Saycə Buxačuxe q'ərar c'evk'alo!
Amdari bula ala efaloval, şot'o saki oç̌alen sabaloval Şone!
8 Ağu fi ǔğěst'ale Q'ončuğon pist'oğo,
Şot'oğoy bitot'aynak' bak'ale İz kiyel bakala cazin camaxun,
T'e fine tumal s'orobi ǔğə̌lt'un şot'oğon!
9 Zu isə həmişə mot'o bayanboz,
İak'ovi Buxačuğo mə̌ğpi tərifləyinşoz!
10 Şot'aynak' ki, metəre pi Şot'in:
«Pist'oğoy mǔq'ina duği sakoz Zu,
Düzgünt'oğo isə mǔq'ə̌lə bi içoğoy zora avuzboz».