68
68-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1 Hayza, Vi şu baksuna ak'est'a, ay Buxačux!
Barta Vi düşmənxo śareśeq'at'un,
Va nu çureğalorox Vi běš çurpes nu baki t'it'ereq'at'un!
2 Barta zap'eśi tağala k'üünəxun hik'k'al nu mandala k'inək'
Şot'oğoxunal hik'k'al maq'an mandi.
Barta gam laft'ala mom xebaki piyexun aç̌ala k'inək'
Şoroxal Buxačuğoy piyexun aç̌eq'at'un!
3 Düzgün bakalt'oğoy isə barta ç̌oyenq'an axšumpi!
Barta içoğoy ük' qayeśi Buxačuğoy bakala gala mə̌ğurq'at'un mə̌ğpi,
Mǔqluğq'at'un c'ovakest'i şot'oğon!
4 Buxačuğoynak' mə̌ğpanan,
Şot'ay s'iya mə̌gěn alabanan,
Asoyxoy loxol Tarak'alt'u tərifləyinşanan!
Q'ončuxe Şot'ay s'i,
Ak'est'anan ef mǔqluğa Şot'ay bakala gala!
5 Yetimxoynak' bava, süpür mandi çupuxxoynak' bač'ane
İz ı̌vel k'oya bakala Buxačux!
6 Tək mandit'oğo k'oj-mes balone Buxačux,
Türminə bakalt'oğo t'et'iin c'eysuni mǔqluğa q'ısmat balone Şo.
Şot'ay laxi k'anunaxun c'eriyorox isə q'oruğa mandi k'inək't'un!
7 Ay Buxačux, Hun azuk'i běš baśi tağat'an,
Ams'i oç̌alaxun c'ovakat'an
8 Oç̌ale ǰı̌k'esay Sinay buruğo İz azuk'axun irəziluğ ğaç̌eśi Buxačuğoy běš,
Göynuxun ağalane barst'ay israilluğoy Buxačux bakala Q'ončuğoy běš!
9 Ay Buxačux, me Vaxun mandi neyməteynak'
Xesuz mandi oç̌aleynak' ağala k'inək'en baki Hun!
T'ǒp-t'ǒpi oç̌alen xena q'uc'p'i içule hari!
10 Vi azuk'e yəşəyinşbsa me məsk'əne,
Goroxt'oğon Vast'a bakala şaat'luği k'ə baksunat'un aksa.
11 Mone, Q'ončuğoy əmir hari p'anep'i,
Sa dəst'ə çupuxxonal t'it'eri me mǔq xavarat'un yəymişi:
12 «Qoşt'un qaybaksa düşməni q'oşunxo,
T'it'unst'a şot'oğoy padçağxo!
Ekinan, ay işq'arxo davina yaq'abi israilluğoy çupuxxo,
Ekinan düşməni kiyexun ext'it'oğo cöybanan!
13 Heq'ədər arśalnan gam k'oya?
Ekinan q'ənədxo gümüşi,
Popurxoval q'ızıli xena çəpeśi göyərçin k'inək' bakanan!»
14 Şəp'eśi Bitova Başarbalt'in me oç̌alaxun padçağxo,
Śalmon buruğo hari ı̌ǰ barala k'inək'e bari şot'oğoy bel bələ!
15 Ay iz kalaluğen amdari pula taşala Başan buruxmux,
İz təpoox gele bakala Başan buruxmux!
16 Het'aynak'nan Sion buruğoy paxılluğa zap'e?
Buxačuğon İçeynak' çureśi buruğoy,
Q'ončuğon İzi həmişəluğ bakala ga k'inək' c'ək'p'i buruğoy
Paxılluğa het'aynak'nan zap'e, ay alloy buruxmux?
17 Vis' hazarxon, baç̌ hazarxone Buxačuğoy davin araboğoy say,
Şot'oğone eçeri Q'ončuğo Sinay buruğoxun İz bakala ı̌vel gala!
18 Vi kiyel baft'i düşmənxo Vi bač'anexun badin laśi Hun t'e alloyluğa.
Amdarxoy bitot'uxun payen ext'i Hun,
Lap Vi əyitəxun c'erit'oğonal Vi bakala gala payt'un eçeri ki,
T'iya məsk'ən sakes bakavax, ay beşi Buxačux bakala Q'ončux!
19-20 Q'ončuğo alxışq'an baki!
Beş ə̌mnəbel bakala yükə ext'ala,
Yax çark'est'es bakala Buxačuxe Şo.
Bitot'uxun üst'ün bakala Q'ončux Buxačuxe yax bisuni kiyexun ext'alo!
21 Duği śark'ale Buxačuğon İz düşmənxoy bula,
Č'ak'k'ale yaq'a aç̌esp'it'oğoy q'açi nu laft'i kəllinə!
22 Axıri əyite tade Buxačuğon:
«Başan buruğoy belal lağayt'un bə̌ğə̌boz şot'oğo,
Dənizi tumexunal bakayin zapi c'evk'oz!
23 T'e vədə vi ük' çaxeśi bakale şot'oğoy axıra ak'i,
Xə̌yoğon lamk'alt'un şot'oğoxun bari p'iya».
24 Çökt'esendi şot'oğo, ay Buxačux!
İsə běğa düşmənxo İz turin oq'a laxi bez Padçağ,
Bez Buxačux hetəre taysa İz ı̌vel gala!
25 Běš ı̌vel mə̌ğur mə̌ğk'alxo,
Bač'anexun fark'alxone taysa Şot'ay!
Dəf duğala xuyərmuxal bune bı̌yex.
26 Buxačuğoy s'iya alabanan, ay azuk',
Q'ončuğo tərifləyinşanan, ay İsrailaxun törəyinşakiyorox.
27 Mone, miyane tayfoğoy ən mis'ik'o bakala Binyamini tayfa,
Miyane kalaluğbalxoxun bol bakala İuday tayfa!
Zevuluni q'a Naft'alini tayfin boş bakala kalat'oğoval azaksa zu!
28 Zorba bale vi kula Buxačuğon, va zor tadale!
Ak'est'a yax Vast'a bakala zora, ay Buxačux,
Həmişə yaxun baki k'inək', həysəəl yaxun baka.
29 Yerusalima, Vi bakala gala
Payurxo eçalt'un Vaynak' padçağxon!
30 Əfçiba t'e ə̌qnə heyvana,
İçoğost'a öküzi zor bakala t'e azuk'i bula č'ak'p'a!
Barta biti xoreśeq'at'un,
Barta Vaynak' gümüşə payq'at'un eçeri!
Bask'est'a Vi loxol ěqeğala bito azuk'xo!
31 Mone, Misiri padçağen iz elçiğone yaq'absa,
K'uşluyoxal kulbuyt'un eysa Buxačuğoy t'ǒğǒl!
32 Ay dünyəne bakala bito ölkoğoy amdarxo, Buxačuğoynak' mə̌ğpanan!
Q'ončuğo tərifləyinşanan!
33 Hələ burqesunast'a laxeśi göyurxoy loxol Tarak'alo,
İz səsen İçust'a bakala zora ak'est'alone Şo!
34 Buxačuğoy zora ef muzel eçeri car sakanan me barada!
İz kul israilluğoy loxol bakalo,
İz zor göynul p'ap'alone Şo!
35 Ak'est'a Vi ı̌vel ganuxun Vi şu baksuna, ay israilluğoy Buxačux!
Vi azuk'a zor tadalonu Hun,
Şot'oğo düşmənxo çökt'est'es bakala elmux tadalonu Hun!
Alxışq'an baki Buxačuğo!