67
67-ci Ǐvel mə̌ğ
Fark'alxoy dəst'in kalat'aynak'. Simlə ət't'əcxon farpi mə̌ğěğala Ǐvel mə̌ğ.
Ay Buxačux, Vi ük' bok'ospsuna q'a xeyir-bərəkətə yaxun kammaba,
Barta Vi piyes şaat' ak'eśi Vi ük'el bask'es baken yan!
Barta me dünyəne bakalt'oğoy bitot'in Vi yaq'en taysuni k'ə baksuna q'amişakeq'at'un,
Bito millətxon Vaxun eğala çark'esuna ak'eq'at'un!
 
Barta azuk'xon Vi s'iyaq'at'un alabi,
Bito azuk'xonq'an Vi s'iya alabi, ay Buxačux!
Barta millətxo mǔqbakeq'at'un,
Barta içoğoy ük' qayeśi mə̌ğpeq'at'un şot'oğon!
Şot'o görə ki, Hun azuk'xo düzgün divanbalonu,
Me dünyəne bakala bito millətxo yaq' ak'est'alonu!
Barta azuk'xon Vi s'iyaq'at'un alabi,
Bito azuk'xonq'an Vi s'iya alabi, ay Buxačux!
 
Buxačuğon, beş Buxačuğon yaxun İz xeyir-bərəkətə kamtenebi,
Oç̌alen yax iz bara bol-bole tadi.
Barta Buxačuğon yax xeyir-bərəkətq'an tadi,
Dünyəne me belxun burqi t'e bel śirik' şu bunesa bitot'in Şot'o çalxi bulq'at'un k'os'bi!