66
66-ci Ǐvel mə̌ğ
Fark'alxoy dəst'in kalat'aynak' śameśi Ǐvel mə̌ğ.
1 Ay me dünyəne bakala bito amdarxo,
Mǔq səsur c'evk'i Buxačuğo alxışp'anan!
2 Şot'ay s'iya mə̌ğur mə̌ğpi alabanan,
Şot'o tərifləyinşanan!
3 Metər upanan Buxačuğo:
«Nu ak'eğala əşuren biq'sa Hun,
Şuk'k'al iz běš nu çurpes bakala zore bu Vast'a.
Düşmənxon diz çökt'est'a Hun,
4 Dirist' dünyənene Va bul k'os'bsa!
Vat'un tərifləyinşbsa,
Vi s'iyat'un mə̌ğpi alabsa».
5 Sa ekinan Buxačuğoy bit'oğo ak'anan,
Şot'in amdarxoynak' bi əşurxoy kalaluğa běğanan!
6 Dənizi xena t'ağaybi q'ariluğe bi Şot'in,
Xenen buy oqa turine c'ovaki Şot'ay azuk'.
Barta ef ük' qayeśeq'an Buxačuğoy kiyexun ayeğalt'oğo ak'i!
7 Zorba bakalo, İz padçağluği axır nu bakalone Şo!
İz pul azuk'xoy loxole,
Şuk'k'al ěqeśes batenekon Şot'ay loxol!
8 Ay azuk'xo, beşi Buxačuğoy s'iya alabanan,
Barta efi Şot'o tərifləyinşala səsə bitot'in ibakeq'an!
9 Şone yax q'orişi efalo,
Beş tur ǰěna lafst'a nu bark'alo.
10 Ay Buxačux, gümüşi təmizluğa gam buxarina yoxlayinşala k'inək',
Hunal yax çətinluğxoxun c'ovakest'in yoxlayinşi!
11 Zindanxon badest'i yax,
Beş bač'ane bı̌hi yüken laxi.
12 Düşmənxon saki ç̌axç̌uxk'alane baki yax,
Aruğoxun c'ovaki, xenaxun baśi c'eğalayan baki!
Ama mone, běğa hetər bolluğan c'evk'i Hun yax!
13 Bok'ospsuni q'urbanxo eşt'eynak' eğoz zu Vi xrama,
Bezi niyətp'i tadi əyiti loxol çurk'oz.
14 Bezi ǰomoxun c'eri,
Bez t'ar ğine niyətp'i tadi əyiti loxol.
15 Kökbi heyvanxo q'urban eçeri bok'osboz Vaynak',
Eğeli, arak'i saal keçin q'urbanxo šamk'oz.
16 Ekinan, ay Buxačuğo çalxi Şot'ay yaq'en tağalorox,
Ekinan Şot'in zaynak' bit'oğo exlətp'az ǔmǔxlaxanan.
17 Bez bula alabi Şot'oz k'alpi zu,
Bez ǰomoxun Şot'aynak'e tərifxo bari.
18 Günaxa za ı̌ša bist'a bartiyzuy,
Q'ončuğon za ǔmǔxtenelaxoy.
19 Ama inebaki za Buxačuğon!
Bez xoyinša coğabsuz tene efi,
20 Bezi afırına nu ibaksuna tene laxi Şot'in!
İzi nu badalbakala çuresuna zaxun nu kambi Buxačuğo alxışq'an baki!