65
65-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1 Vi tərif Vaxune Siona, ay Buxačux,
Bex p'ap'esp'alyan yan Va elasp'i tadi əyitmoğo!
2 Va afırıpi k'alk'alt'oğo ibakalonu Hun,
Vi t'ǒğǒl eğalt'un amdarxo bito!
3 Günaxxoy boş batk'eyan tayansa,
Ama Hun beş taxsırxoxun c'ovaki beş elmoğo çark'est'alonu.
4 He bəxt'əvəre Hun c'ək'p'i Va ı̌šabiyo,
İçeynak' Vi bakala ı̌vel gala mesbiyo.
Vi k'ojen, Vi ı̌vel ganen tadala neymətxon boşalyan yan!
5 Ay Buxačux, ay yax çark'est'ala Buxačux,
Hun heq'ədər zorba, heq'ədər düzgün baksunane ak'est'a Vi yax kul boxost'unen!
Dirist' dünyəni, lap dənizxoy t'e ç̌oye bakalt'oğoynak' umudi ganu Hun!
6 Kala zore q'ončux bakalo,
Buruxmoğoy binorina Vi kiin ost'aarbi laxiyonu Hun!
7 Dənizi guğultina bot'iyo,
Ěqeśi ləpoğo bask'est'i k'inək',
Ěqeśi azuk'xoval bask'est'iyonu Hun!
8 Dünyəni t'e bel bakalt'oğonal Vi biq'i əşurxo ak'i Va bult'un k'os'bsa,
Běğc'eğalaxun burqi běğ batk'ala tərəfəl śirik',
Oç̌ali ç̌oyel bakalt'oğoy bitot'in Va tərifləyinşala mə̌ğure mə̌ğě.
9 Oç̌ali q'ayğinan manst'a Hun,
Şot'o xe duği bərəkətlun bsa.
Buxačuğon xe duğala arxe ǰomo biq'teneğon,
Şot'ay běğala oç̌alen tadala bar bole bakon,
Axıri Hun Vi kiinen həzirbsa me oç̌ala!
10 Hunen sərnoğo xenen buybsa,
Ezbi ganxo ağalinen cugübi hamavarbsa.
Vi xeyir-bərəkətene göyünbaksa biti hər śil!
11 Beşi hər usen ext'ala baren
Vi heq'ədər kulqay baksunane ak'est'a,
Vi kul laft'ala hər ganen bolluğe eşt'a!
12 Běğa xam ganu göyün oyen,
Buruxmoğo mǔqluğen hetəre haq'e!
13 Q'oruğxo sürüğoy,
Dəroğo taxıli kiyexun ak'es tene baksa,
Bitot'ay ük'e qayesa, muz qaypi mə̌ğt'unne şot'oğon!