64
64-ci Ǐvel mə̌ğ
Fark'alxoy dəst'in kalat'aynak'. Davidi Ǐvel mə̌ğ.
1 Ay Buxačux, bezi Va afırıpi k'alpsuna, bez səsə ibaka,
Bez ük'e q'ı̌ badala me düşmənxoxun bez elmoğo çark'est'a!
2 Me zalımxon içoğoy ük'e biq'est'i pisluğxoxun,
Şər bakalt'oğoy pis niyətxoxun za q'orişa!
3 İçoğoy ǰomoxun c'eğalt'oğon ğayin me k'inək'e bost'a,
İçoğoy hər əyit hari ox k'inək'e t'ə̌q'esa amdara!
4 Pusq'una arśi ǒxə̌lbal k'inək' arśi yaq't'unběğsa,
Bürdənt'un dǒpst'a sal sa taxsır nu bakalt'u.
Hik'k'alaxun q'ı̌tet'unbsa şot'oğon!
5 Hələ t'iyə̌mint'oğoval k'alpi pis əşur biq'seynak' yaq'nuxunt'un c'evksa,
Təlinə hetər laxseynak't'un maslaatbsa.
"Şuk'k'ali xavaral tene bakal" next'un.
6 Mani bic'luğa əşp'est'una fikirbi bə̌ğə̌bit'uxun oşa
"Běğa he şaat'e beş haq'ılen bot'i" pi fərəxləyinşt'unbaksa.
İnsan həgigiyal bic' bakala şeye!
7 Ama Q'ončuğon şot'oğo İz oxurxon yaralayinşale,
T'e vədəl běğalt'un ki, taşevk'et'un.
8 T'iyə̌mint'oğoynak' piyorox bito içoğoy bel barale;
Şot'oğoy axıra ak'alt'oğonal içoğoy bula ǰı̌k'k'alt'un,
Şot'oğo axšumi ga balt'un.
9 İnsanxon mot'o ak'i q'ı̌balt'un,
Buxačuğoy biq'i əşurxo muzel eçeri car sakalt'un!
Me barada fikirbi Şot'ay bit'oğo p'urum içoğoy eyex badi bakalt'un!
10 Barta düzgünt'oğon içoğoy mǔqluğa Q'ončuğost'aq'at'un ak'i,
Şot'ay q'ənədi oq'aq'at'un gireśi!
Barta ük'təmizt'oğon Şot'ay s'iya alabeq'at'un!