69
69-ci Ǐvel mə̌ğ
Fark'alxoy dəst'in kalat'aynak'. Davidi "Gěše vard k'inək' gözəl bakala irəziluğ" uk'ala faren mə̌ğěğala Ǐvel mə̌ğ.
1 Çark'est'a za, ay Buxačux, xenen za q'uc'ene,
Hari bez xirt't'əyel śirik' p'ap'ene!
2 T'etər sa batağluğaz baft'e ki,
Bez tura laxala ga tez bə̌ğə̌bsa.
Xenen taneşt'a za, bə̌ğə̌loy sa oqnu batk'ala k'inək'zu zu!
3 Halnuxunez bite zu köməyə k'alpsaxun,
Bez piin neğe q'aribaki Buxačuğoy yaq'a běğsaxun.
4 Hik'k'ali loxol za nifrətbalorox bez biin popaxun gelene bake,
Nahaq' gala bez bač'anexun baft'it'oğoy saye avuzbake.
Zaxun het'u tadi ext'es tet'un baksa tez q'amişaksa.
5 Bez biq'i əşurxo bito Vi piin běše, ay Buxačux,
Bez günaxxo Vaxun c'ap' tene.
6 Za ç̌omə̌yin ma efa, ay Buxačux, ay Q'oşuniQ'ončux!
Tene Va umudbakalt'oğoyal bula k'os'bi bakoz,
Va q'ə̌věğalt'oğoval ot'p'est'i bakoz zu, ay İsraili Buxačux!
7 Axıri ǰame q'ončuxal bazki zu Vi yaq'en taysuna görə,
Bezi ç̌oyel əyitəl hari vədə bakene.
8 Bezi ı̌šat'oğone zaxun ç̌o taradi,
Nanaxun sa viçimoğoy piyexunez biti zu.
9 Şot'o görə ki, Va laft'ala hər əyit zaal lafest'a,
Vi k'oja çuresunen za bok'osp'i-śinne,
Vi bakala gane barada pis əyit ibakat'an bez pisa ibakala k'inək'ez baksa!
10 Bezi ğurux efi ǒnepsunal
Lağlağin gane bake,
11 Mə̌yin lapi yas efat'anal bez loxolt'un axšume!
12 Dirist' şəhəren zaxune əyite,
Finağoyxoyal ǰomoz baft'e zu!
13 Zu isə Vaz afırıpi k'ale, ay Q'ončux,
Za coğabsuz ma efa zu Vi piyes şaat' ak'eğala vədine,
Vi nu badalbakala çuresuna ak'est'i za çark'est'a.
14 Zapa c'evk'a za me çeyilluğaxun,
Bafst'a ma barta!
Za bə̌ğə̌loy xeyurxoy boş batevk'ala me düşmənxoxun çark'est'a!
15 Ma barta za selen taşeri bə̌ğə̌loy sa oqnu bosane,
Bez baft'i kure ç̌oya but'esa ma barta!
16 Vi nu badalbakala çuresuni k'ə baksuna ak'est'i za çark'est'a, ay Q'ončux,
Bez loxol běğa, Vi ük' bok'ospsuna zaxun kammaba!
17 Me Vi k'ula nu aksuna ma laxa,
Eki bez t'arnu p'ap'a, za ibaka.
18 Zaxun ə̌xil ma baka, eki za çark'est'a,
Za bez düşmənxoy kiyexun haq'a!
19 Anksa Hun bez düşmənxoy balt'oğo bitova:
Şot'oğoy za bakala nifrətə q'a
Za biyaburbi amdarxoy piyexun saksun çuresuna.
20 Za uk'ala əyitmoğo ibaki bez ük'e xə̌xə̌yesa,
Bez kiyexun hik'k'al tene ayesa!
Nə zaynak' sa ük' bok'osp'ale bu,
Nəəl sa ük' tadal.
21 Busabakat'an ağut'un tadi za,
Xenezaluğa oq'oyent'un bot'i şot'oğon.
22 Barta q'urbani q'onaxluğxo c'ovakest'ala gala içoğoy kul-turq'an ğaç̌eśi,
Barta içoğoxun sa ist'olin bel arśalorox içoğoy turin oq'axun kašk'aloroxq'an baki.
23 Piin işiğq'an bari,
Bač'anq'an xoxbaki şot'oğoy barta!
24 Vi hirsləyinşaksuni k'ə baksuna ak'est'a şot'oğo,
Barta Vi bok'osp'i śik'ala əcuğ şot'oğoy belq'an bari!
25 K'ojin işiğq'an aç̌i şot'oğoy,
Çadırxoq'an xarabina mandi!
26 Şot'o görə ki, Hun Vi ç̌oya taradit'oğoy bač'anexun baft'iyoroxe,
Bitit'oğo samalal lik't'i sakaloroxe şorox.
27 Śampa şot'oğoy me günaxal cazasuz nu mandala günaxxoy siyəyinə,
Vi běš içoğo təmizə c'evksa ma barta şot'oğo!
28 Silba şot'oğoy s'iya Vi girkəxun,
Həmişəluğ yəşəyinş q'azayinşes bakala düzgünt'oğoxun sa siyəyinə maq'at'un baki barta.
29 Zu isə goroxzu, dərde boş bakala sa amdarzu,
Zapa c'evk'a za me əzyəti boşt'an, ay çark'est'es bakala Buxačux!
30 Mə̌ğpi alaboz Buxačuğoy s'iya zu,
Şükürbala mə̌ğur c'eğale bez ǰomoxun.
31 Mo Q'ončuğoy piyes öküzi q'urbanaxunal şaat' ak'eğale,
Bul-turaxun sagala q'urban eçala arak'axunal üst'ün bakale.
32 Fağırxo mǔqbakale mot'o ak'i,
Buxačuğo qə̌věğalt'oğoy ük' qayeğale!
33 Axıri inebaksa Q'ončuğon eht'iyəci boş bakalt'oğo,
İz azuk'axun əzyət ak'alt'oğoy saycət'u nu ibaksuna tene laxsa.
34 Barta göyurxoxun q'a oç̌alaxun,
Barta dənizxoxun q'a mot'oğoy boş bakalt'oğoy bitot'uxun Şot'aynak' tərifq'an hari!
35 Çark'est'ale Buxačuğon Siona,
İudeyin şəhərmoğo təzədən biq'i İz azuk'a t'iya eçeri arśest'ale,
Şot'oğo oç̌al tadale.
36 Buxačuğo bul k'os'balt'oğoxun törəyinşakit'oğo mandale me oç̌al,
Şot'o çalxalt'oğon t'iya məsk'ən sakale!